लोकसंवाद संवाददाता | खेलकुद | आश्विन १०, २०७७
इंग्लिस प्रिमियर लिग फुटबलमा म्यानचेस्टर युनाइटेडले पहिलो जीत हात पारेको छ ।
शनिबार साँझ भएको खेलमा ब्राइटनलाई ३–२ गोल अन्तरले पराजित गर्दै युनाइटेडले पहिलो जीत निकालेको हो । ब्राइटनको मैदानमा एक गोलले पछि परेको स्थिति उल्टाएर युनाइटेडले जीत हात पारेको हो ।
खेलको ४० औं मिनेटमा निल माउपेले पेनाल्टी मार्फत गोल गर्दै ब्राइटनलाई सुरुवाती अग्रता दिलाएका थिए ।
युनाइटेडका माटिचले पेनाल्टी बक्समा फल गरेपछि ब्राइटनले पेनाल्टी पाएको थियो । तर, ४३ औं मिनेटमा ब्राइटनका लेविस डंकले आत्मघाती गोल गरेपछि पहिलो हाफमा दुवै टोलीको १–१ गोल भएको थियो ।
खेलको ५५ औं मिनेटमा मार्कस रास्फोर्डले गोल गर्दै युनाइटेडलाई २–१ को अग्रता दिलाए । उनले ५३ औं मिनेटमा गोल गरेपनि त्यसलाई रेफ्रीले अफसाइड दिएका थिए ।
इन्जुरी समयको पाँचौ मिनेटमा सोली मार्चले गोल गरेपछि खेल २–२ गोलको बराबरीमा पुगेको थियो । तर, इन्जुरी समयको ११ औं मिनेटमा ब्रुनो फर्नान्डेसले पेनाल्टीमा गोल गर्दै युनाइटेडलाई ३–२ को जीत दिलाए ।
जितसँगै युनाइटेडले २ खेलमा ३ अंक जोडेको छ । युनाइटेड तालिकाको १३ औं स्थानमा छ । पहिलो खेलमा युनाइटेड क्रिस्टल प्यालेससँग ३–१ ले पराजित भएको थियो । ब्राइटनको ३ खेल खेलेबाट ३ अंक रहेको छ ।