‘कौसी क्विन फोटो प्रतियोगिता’ हुने
आश्विन १३, २०७७

काठमाडौं । कौसी खेती प्रवर्द्धनका लागि वाग्मती प्रदेशस्तरीय ‘कौसी क्विन–२०७७ फोटो प्रतियोगिता’ हुने भएको छ । प्रतियोगितामा राम्रो फोटो पठाउनेलाई विभिन्न पुरस्कारको व्यवस्था गरिएको छ । प्रज्ञान क्रियसन प्रालिद्वारा सञ्चालित हलोखबर डटकमले आयोजना गर्ने सो प्रतियोगितामा वाग्मती प्रदेशका प्रतियोगीले मात्र भाग लिन पाउने  प्रालिका प्रबन्धक मनोज श्रेष्ठले बताउनुभयो । 

कौसी खेतीलाई प्रवर्द्धन गर्ने उद्देश्यले यो प्रतियोगिता आयोजना गरिएको बताउँदै उहाँले प्रतियोगितामा सहभागी हुनका लागि कौसी खेती गर्दै गरेको कम्तीमा तीन फोटो र एउटा भिडियो पठाउनुपर्ने जानकारी दिनुभयो । 

पठाइएको फोटोमा क्याप्सन अनिवार्य रुपमा राख्नुपर्ने हुन्छ । विवरण नेपाली वा अङ्ग्रेजी भाषामा हुनुपर्ने, फोटो स्पष्ट र ठूलो साइजको हुनुपर्ने र इमेलबाट मात्र पठाउनुपर्ने प्रावधान  छ । प्रतियोगितामा सहभागी हुनका लागि कुनै शुल्क नलाग्ने प्रबन्धक श्रेष्ठले बताउनुभयो । 

सर्वोत्कृष्ट पुरस्कार विजेतालाई  ५५ हजार ३५० मूल्य बराबरको कौसी खेती गर्ने विभिन्न सामग्री प्रदान गरिने छ  । विधागत पुरस्कारअन्तर्गत तरकारी खेतीतर्फ प्रथम हुनेलाई २५ हजार ३५०, दोस्रो हुनेलाई रु १६ हजार ८५० र तेस्रो हुनेलाई  १० हजार ५० मूल्य बराबरको कौसी खेतीका विभिन्न सामग्री प्रदान गरिने आयोजकले जनाएको छ । 

साना जनावर (कुखुरा, बट्टाइँ, परेवा, हाँसलगायत) विधातर्फ प्रथम हुनेलाई  सात हजार, दोस्रालाई छ हजार र तेस्रालाई  पाँच हजार प्रदान गरिने छ भने साना फलफूल तथा पुष्प खेती विधातर्फ प्रथमलाई  २० हजार, दोस्रोलाई  १५ हजार र तेस्रोलाई  १० हजार प्रदान गरिने बताइएको छ । 

प्रतियोगी छनोटका लागि हलोखबर डटकमको फेसबुक पेजमा पोस्ट गरिएका आफ्नो फोटोमा प्रतियोगीले धेरैभन्दा धेरै लाइक, कमेन्ट, सेयर र ट्याग गर्ने र गर्न लगाउनुपर्ने हुन्छ । त्यसका साथै हलोखबर डटकम पेज लाइक र सेयर अनिवार्य गनुपर्ने हुन्छ । जुन फोटोमा जसको जति लाइक, कमेन्ट र सेयर हुन्छ, त्यसले त्यति नै अङ्क प्राप्त गर्ने आयोजकले जनाएको छ ।

फोटो पठाउने अन्तिम मिति यही असोज मसान्तसम्म  छ । आगामी कात्तिक १ गते सबै प्रतियोगीका फोटो एकैसाथ हलोखबर डट कमको पेजमा पोस्ट गरिने छ  । कात्तिक महिनाभर सो फोटो फेसबुकमा रहनेछन् । यसको नतिजा मङ्सिर १ गते सार्वजनिक हुने आयोजकले जनाएको छ ।