लोकसंवाद संवाददाता | समाज | कार्तिक ६, २०७७
खाेटाङ । चाडपर्वको मौका छोपेर व्यापारीले गर्न सक्ने कालोबजारी नियन्त्रण गर्न रावाबेँसी गाउँपालिकाले दैनिक उपभोग्यवस्तुको दरभाउ निर्धारण गरेको छ ।
हिन्दू नेपालीहरुको महान् चाड दशैँ, तिहार तथा छठपर्वको अवसरमा व्यापारीले गर्न सक्ने कालोबजारी नियन्त्रण गर्न आजदेखि नै लागू हुनेगरी गाउँपालिकाले मासुजन्य वस्तु तथा खाद्यान्नको दरभाउ निर्धारण गरेको हो ।
गाउँ कार्यपालिकाको बुधबार बसेको बैठकले प्रतिकेजी खसी तथा स्थानीय जातको कुखुराको मासु ७०० रुपैयाँ, राँगाको मासु ३५० रुपैयाँ, सुँगुरको मासु २४० रुपैयाँ, ब्रोइलर कुखुराको मासु ३०० रुपैयाँ, गिरिराज कुखुराको मासु ६०० रुपैयाँ र स्थानीय खोला तथा पोखरीको माछाको मूल्य ५०० रुपैयाँ निर्धारण गरेको छ । यसैगरी प्रतिकेजी स्थानीय जातको चामल (बास्मती लामो) १०० रुपैयाँ, स्थानीय जातकै (छोटो) ७५ रुपैयाँ, वर्षे धानको चामल ७० रुपैयाँ, बाहिरी जिल्लाबाट ल्याइएको जिरा मन्सुली चामल ७५ रुपैयाँ, सोना मन्सुली चामल ५० रुपैयाँ र कान्छी मन्सुली चामलको मूल्य ४५ रुपैयाँ निर्धारण गरिएको गाउँपालिका प्रमुख लीलानाथ निरौलाले जानकारी दिनुभयो ।
उहाँका अनुसार प्रतिकेजी स्थानीय जातको कालो दाल १५० रुपैयाँ, सेतो मास १०० रुपैयाँ, मुसुरी दाल १४० रुपैयाँ, प्रतिलिटर तोरीको खाने तेल १९० रुपैयाँ, सूर्यमुखी तेल १८० रुपैयाँ, प्रतिकेजी आयोडिनयुक्त नुन ३० रुपैयाँ र ढिके नुनको मूल्य २० रुपैयाँ निर्धारण गरिएको छ । गाउँ कार्यपालिकाको बैठकले निर्धारण गरेको मूल्यमा व्यापारीले आफ्नो सामान बिक्री गरे/नगरेको बारेमा अनुगमन समितिले छड्के निरीक्षण गर्ने र बढी मूल्य लिएको पाएमा कानूनी कारवाही गर्ने निर्णय गरिएको छ ।
दश स्थानीय तह रहेको जिल्लामा चाडपर्व भित्रिएसँगै व्यापारीले कालोबजारी शुरु गरेको गुनासो आएका छन् । जिल्लामा हुने कालोबजारी नियन्त्रण गर्न मातहतका प्रहरी परिचालन गरिएको जिल्ला सुरक्षा समितिका संयोजक एवं प्रमुख जिल्ला अधिकारी शालिग्राम शर्मा पौडेलले जानकारी दिनुभयो । यदि कोहीकसैले कुनै पनि बहानामा कालोबजारी गरेर उपभोक्ता ठग्न खोजेमा तुरुन्त प्रहरीको १०० नं हटलाइन सेवामा फोन गर्नसमेत जिल्लावासीमा आग्रह गरिएको प्रजिअ पौडेलले बताउनुभयो ।