आठ लाखको अखाद्य वस्तु बरामद

आठ लाखको अखाद्य वस्तु बरामद

लोकसंवाद संवाददाता  |  समाज  |  कार्तिक ७, २०७७

बैतडी । एक महिनामा बैतडीमा करीब आठ लाखको अखाद्य वस्तु बरामद गरी नष्ट गरिएको छ ।  संयुक्त बजार अनुगमन समितिले एक  महिनामा विभिन्न बजारमा अनुगमन गर्दा सात लाख ७० हजारभन्दा बढीको म्याद गुज्रेको सामग्री बरामद गरेर नष्ट गरेको हो । 

असोज पहिलोदेखि अन्तिम सातासम्म जिल्लाका विभिन्न स्थानमा बजार अनुगमन गरिएको खाद्य प्रविधि तथा गुण नियन्त्रण डिभिजन कार्यालयका प्रमुख कृष्णदत्त लेखकले बताउनुभयो । जिल्लाको शिवनाथ र पञ्चेश्वर गाउँपालिका बाहेकका सबै स्थानीय तहमा पहिलो चरणमा अनुगमन गरिएको थियो ।

अनुगमनका क्रममा चाउचाउ, बियर, पीठो, नम्किनलगायत वस्तु म्याद गुज्रेका पाइएका उहाँले बताउनुभयो । उपभोग्य सामग्रीको उत्पादन मिति र उपभोग्य मिति नहेर्ने गरेका कारण बजारमा म्याद नाघेका सामग्रीसमेत बिक्री वितरण भइरहेका लेखकले जानकारी दिनुभयो । उहाँले भन्नुभयो, 'म्याद नाघेका सामग्रीका बारेमा न व्यापारीहरुले हेर्ने गरेका छन्, न उपभोक्ताले नै । यसले गर्दा बजारमा म्याद नाघेका सामग्री बिक्री वितरण भइरहेका छन् ।'

बजार अनुगमनका क्रममा दर्ता नभएका पसलहरुलाई सम्बन्धित निकायमा दर्ता हुन आग्रह गरिएको छ भने प्रत्येक पसलमा मूल्यसूची राख्नसमेत आग्रह गरिएको छ । चाडपर्वलाई लक्षित गरेर अनुगमन गरिएको भए पनि अनुगमनलाई निरन्तरता दिनुपर्ने उपभोक्ताहरुले बताएका छन् ।

निरन्तर अनुगमन भएमा बजारमा हुने कालोबजारीमा केही कमी आउने निङ्गलाशैनी मावि देहीमाडौँका शिक्षक तिलक बोहराले बताउनुभयो । उहाँले भन्नुभयो, 'पसलबाट किन्ने सामग्रीको म्याद भए÷नभएको बारेमा उपभोक्ताहरु पनि सचेत हुनु जरुरी रहेको छ ।'