लोकसंवाद संवाददाता | समाचार | चैत्र २३, २०७५
भारतको मिजोरम राज्यको साइरंग निवासी एक बालकले साइकल खेल्ने क्रममा सानो चल्ला किचेपछि उपचारका लागि अस्पताल लगेका छन् ।
गल्तीले चल्ला किचेपछि ६ वर्षीय डेरेक निकै आत्तिए र चल्ला च्यापेर अस्पताल तिर लागे ।
उनको यस अवोध केटाकेटीपनका लागि उनी अध्ययनरत स्कूलले उनलाई सम्मान पनि गरेको छ ।
अस्पतालले विना रकम उपचार प्रदान गर्दैन भन्ने बुझेर उनले एक हातमा दश रुपैयाँको नोट र अर्को हातमा चल्ला बोकेर अस्पताल पुगेका थिए ।
अस्पताल पुगेर उनले त्यो चल्ला बचाउनका लागि डाक्टरहरुलाई अनुरोध गरेका थिए ।
यस कुरालाई शिलांग विश्वविद्यालयका प्राध्यापक संगा ले सामाजिक संजालमा शेयर गरेका हुन् ।
त्यसपछि डेरेक सामाजिक संजालमा भाइरल भएका थिए ।
डेरेक का बाबु धिरज क्षेत्री जो पेशाले किसान हुन्, उनले प्राध्यापक संगालाई बताए अनुसार, ‘डेरेक साइकल खेल्दै थिए, खेल्ने क्रममा उनको साइकलले चल्लालाई किच्यो र उनले बाबुसँग चल्लालाई अस्पताल लैजान पैसा मागे । उनलाई यो पनि थाहा थिएन कि साइकलले किचेर चल्लाको देहान्त भैसकेको थियो ।’
अस्पतालबाट फर्किए पछि पनि डेरेक चल्लालाई बचाउन सय रुपैयाँ लिएर पुनः अस्पताल जाने ढिपी गर्दै थिए । केही सिप नलागेपछि उनका आफन्तले उनलाई चल्ला मरिसकेकोले अब उपचार नहुने भनेर सम्झाउनु परेको थियो ।
एजेन्सीको सहयोगमा