नन्दु उप्रेती | साहित्य | पुष १८, २०७७
मोवाईलबाट मेल लेख्नअघि
कागजमा कलमले लामो चिठ्ठी लेखेँ तिमीलाई
मोवाईलको स्क्रीनमा खसेका आँसुका थोपाको
के मुल्य हुन्छ र ?
जून रोएर बगेका शीतका आँसुले
सबेरै बलेँ सीमा छाडेका छापहरू जस्तै
मायालु छापहरू छापिए
चिठ्ठी लेखेको कागजभरि ।
बचेरालाई चारा खोज्दै गर्दा
शिकारीले एकल्याएको एकल चरीले
रुखका डालीमा खसाएका आँसुका छापहरू जस्तै
विरही छापहरू छापिए
चिठ्ठी लेखेको कागजभरि ।
तिमी नै तिमी भरेर
तिमीले पठाइदिएको मोबाईलमा
ती अक्षरहरू सार्न सक्दिन प्रिय म
प्रेम, बिछोड, पर्खाइ र यादहरू खिपेर
आँसुका अक्षरहरूले
हृदयभरि लेखेको गीत गुनगुनाउदै
तिमीलाई पर्खिरहन्छु
तिमीलाई पर्खिरहन्छु म ।