लोकसंवाद संवाददाता | खेलकुद | बैशाख ११, २०७६
काठमाडौं । चेन्नई सुपर किंग्स इण्डियन प्रिमियर लिग (आइपिएल)को अंकतालिकामा शीर्ष स्थानमा उक्लिएको छ ।
मंगलबार राति सम्पन्न खेलमा सनराइजर्स हैदरावादलाई पराजित गरेसँगै चेन्नई एक स्थान सुधार गर्दै शीर्षमा उक्लिएको हो । चेन्नईको ११ खेलबाट १६ अंक छ ।
यसअघि शीर्ष स्थानमा रहेको दिल्ली क्यापिटल एक स्थान तल झरेको छ । समान खेल खेलेको दिल्लीको १४ अंक छ ।
यसरी सम्भव भयो चेन्नईको आठौं जित
टस हारेर ब्याटिङ गर्न आएको हैदरावादले निर्धारित ओभरमा ३ विकेट गुमाएर १७५ रन जोड्यो । टिमका लागि मनिष पाण्डेले अभिजित ८३ रन जोडे । उनले ४९ बलमा ७ चौका र ३ छक्का प्रहार गरे । यस्तै, प्रारम्भिक ब्याट्सम्यान डेभिड वार्नरले ४५ बलमा ५७ रनको योगदान दिए ।
चेन्नईका हरभजन सिंहले दुई र दीपक चहरले एक विकेट लिए ।
चेन्नईले १९.५ ओभरमा चार विकेट गुमाएर लक्ष्य पूरा गर्यो । चेन्नईका सेन वाट्सनले ५३ बलमा ९६ रनको आक्रामक पारी खेलेपछि चेन्नईले चालू आइपिएलमा आठौं जित दर्ता गर्यो ।चेन्नईको जितमा सुरेश रैनाले पनि महत्वपूर्ण पारी खेले । उनले २४ रनमा ३८ रन जोडे ।
हैदरावादका लागि भुवनेश्वर कुमार, रासिद खान र सन्दीप शर्माले समान एक विकेट लिए ।