लोकसंवाद संवाददाता | समाचार | बैशाख २०, २०७८
काठमाडौं । जबरजस्ती करणी मुद्दामा दोषी ठहर भएका फरार प्रतिवादीलाई प्रहरीले पक्राउ गरेको छ । संखुवासभाको चैनपुर नगरपालिका–१० घर भएका लेकबहादुर अधिकारी उर्फ गणेशलाई ईलाका प्रहरी कार्यालय चैनपुरबाट खटिएको टोलीले पक्राउ गरेको हो ।
अपराध गरेको १० वर्षपछि उनलाई सुनसरीको खनारबाट पक्राउ गरिएको ईलाका प्रहरी कार्यालय चैनपुरका इन्सपेक्टर योगराज खतिवडाले बताउनुभयो । खनारमा रहेको प्लाईउड कारखानामा काम गरिरहेको सुराकको आधारमा प्रहरी टोली त्यहाँ पुगेको थियो ।
संखुवासभाको साविक खराङ गाबिस–२ का ४३ वर्षीय गणेशले १३ वर्षीया बालिाकालाई बलात्कार गरेका थिए । सो मुद्दामा ०७२ माघ १८ मा अदालतले उनलाई १२ वर्ष कैद हुने फैसला गरेको थियो । अधिकारीले २०६८ साल माघ १२ गते १३ वर्षिय नाबालिकालाई जबरजस्ती करणी गरी फरार भएका थिए । जिल्ला अदालत संखुवासभाको आदेशले उनलाई कारागार चलान गरिएको इन्सपेक्टर खतिवडाले बताउनुभयो ।
ईलाका प्रहरी कार्यालय चैनपुरले यसअघि ०७८ बैशाख ६ मा लागूऔषध मुद्दाका फरार प्रतिवादीलाई पक्राउ गरेको थियो । चैनपुर नगरपालिका–४ घर भएका ५३ वर्षीय तिलबहादुर तामाङलाई पक्राउ गरेको हो । प्रहरी निरीक्षक खतिवडाका अनुसार तामाङलाई जिल्ला अदालत संखुवासभाको ०७६ जेठमा लागुऔषध मुद्दामा ४ महिना २४ दिन कैद र ५ हजार जरिवाना हुने फैसला गरेको थियो ।