लोकसंवाद संवाददाता | समाचार | असार २०, २०७८
प्रतिनिधिसभा विघटनविरुद्ध परेका रिटहरूमा सभामुख अग्नि सापकोटा पक्षका वकिलहरूको बहस सुरु भएको छ । अधिवक्ता मेघराज पोखरेलले सुरुमा बहस थालेका छन् ।
पोखरेलले संविधानको धारा ७६ को उपधारा ५ को व्याख्या नै अहिलेको मुख्य विषय भएको बताएका छन् । उनले धारा ७६ को उपधारा ५ मा ह्वीप लाग्छ भनेर कहीँ नलेखिएको तर्क गरेका छन् ।
सभामुख सापकोटाका तर्फबाट वरिष्ठ अधिवक्ताहरू श्यामप्रसाद खरेल, लभकुमार मैनाली, उपेन्द्रकेशरी न्यौपाने र अधिवक्ता श्रीकृष्ण सुवेदीले बहस गर्नेछन् । सभामुखको तर्फबाट बहस गर्ने वकिलहरूलाई २ घण्टाको समय दिइएको छ ।
आजै रिट निवेदक पक्षका वकिलहरूले जबाफी बहस पनि गर्ने तयारी छ । जबाफी बहस सकिएपछि एमिकस क्युरीले राय दिने र फैसलाको मिति तोकिनेछ ।
प्रतिनिधिसभा विघटनविरुद्ध दायर रिटहरूमाथि संवैधानिक इजलासमा ९ असारदेखि निरन्तर बहस हुँदै आएको छ ।