लोकसंवाद संवाददाता | कारोबार | श्रावण १, २०७८
धितोपत्र बोर्डले मानुषी लघुवित्त र सानिमा लाइफ इन्स्योरेन्सलाई प्राथमिक शेयर (आईपीओ) जारी गर्न अनुमति दिएको छ ।
मानुषी लघुवित्तलाई ३ करोड ९३ लाख ७५ हजार रुपैयाँ बराबरको ३ लाख ९३ हजार ७५० कित्ता र सानिमा लाइफ इन्स्योरेन्सलाई ६० करोड रुपैयाँ बराबरको ६० लाख कित्ता शेयर बिक्री गर्न अनुमति दिएको बोर्डले जानकारी दिएको छ ।
मानुषी लघुवित्तले २०७८ वैशाख १३ गते र सानिमा लाइफ इन्स्योरेन्सले २०७८ जेठ ९ गते बोर्डसँग शेयर बिक्रीका लागि अनुमति माग गरेका थिए ।
सानिमा लाइफ इन्स्योरेन्स कम्पनीले जारी गर्ने ६० लाख कित्ता शेयरमध्ये कर्मचारीहरू र सामूहिक लगानी कोषका लागि समान ५ प्रतिशतले हुन आउने ३.३ लाख गरी ६ लाख कित्ता छुट्याएर बाँकी रहेको ५४ लाख कित्ता शेयर सर्वसाधारणलाई जारी गर्नेछ ।
सानिमा लाइफ इन्स्योरेन्सको आईपीओको बिक्री प्रबन्धक प्रभु क्यापिटल र मानुषी लघुवित्त वित्तीय संस्थाको बिक्री प्रबन्धक नेपाल एसबीआई मर्चेन्ट बैंकिङ लिमिटेड रहेका छन् ।