लोकसंवाद संवाददाता | समाचार | श्रावण २०, २०७८
आधिकारिकता विवादमा सर्वोच्च अदालतले जनता समाजवादी पार्टी (जसपा)का नेता महन्थ ठाकुर खेमाको निर्वाचन आयोगको निर्णयविरुद्धको रिटमा अन्तरिम आदेश दिन अस्वीकार गरेको छ । आयोगले अध्यक्ष उपेन्द्र यादव समूहलाई पार्टीको आधिकारिकता दिएपछि नेता ठाकुर खेमा अदालत पुगेको थियो ।
नेता ठाकुरले दायर गरेको रिटमा न्यायाधीश प्रकाशमानसिंह राउतको इजलासले अन्तरिम आदेश दिन अस्वीकार गरेको हो । निर्वाचन आयोगले ११ साउनमा जसपाको आधिकारिकता उपेन्द्र यादव खेमालाई दिएको थियो । यससँगै ठाकुर १५ साउनमा सर्वोच्च गएका थिए । रिटमा निर्वाचन आयोगसमेतलाई विपक्षी बनाइएको छ ।
जसपाको ५१ सदस्यीय कार्यकारिणी समितिमा ३४ जना अध्यक्ष यादव पक्षमा उभिएपछि आयोगले आधिकारिकता दिएको थियो । नेता ठाकुर खेमामा १६ जना मात्र उभिएका थिए ।