राधा कणेल | साहित्य | आश्विन ९, २०७८
नारी हुँ म, नारी नै रहन मन छ
राधा होइन तर मलाई कृष्ण बन्न मन छ ।
सबैको मनमा राज गर्दै
प्रेम जताउँदै
मोहित बनाउँदै
रासलीला रचाउन मन छ वृन्दावनमा
नारी हुँ म, नारी नै रहन मन छ
राधा होइन तर मलाई कृष्ण बन्न मन छ ।
अनन्त प्रेम गर्न सकूँ एउटासँग
निसंकोच रोज्न सकूँ अर्कै जीवनसाथी
निर्धक्क गर्न सकूँ विवाह १६ हजार १०८ युवासँग
तथापि, मलाई
सबैको भगवान् बन्न मन छ
नारी हुँ म, नारी नै रहन मन छ
राधा होइन तर मलाई कृष्ण बन्न मन छ ।
मलाई हाँक्न मन छ यो विश्व
सल्काउन मन छ आगो युद्धको
आफन्त-आफन्तमा कलह पैदा गरीगरी
रचाउन मन छ युगको महाभारत
यसको बाबजुद मलाई
सबैको भगवान् बन्न मन छ
नारी हुँ म, नारी नै रहन मन छ
राधा होइन तर मलाई कृष्ण बन्न मन छ ।
गरेर छल, दिएर धोका
'धर्म संस्थापनार्थाय' भन्दै
युगयुग जन्मिन मन छ
धर्मकै नाममा विध्वंश गर्दै
धर्मकै रक्षार्थ अधर्म मच्चाउँदै
भगवान् बन्न मन छ
नारी हुँ म, नारी नै रहन मन छ
राधा होइन तर मलाई कृष्ण बन्न मन छ ।