लोकसंवाद संवाददाता | कारोबार | पुष ५, २०७८
बैंकमा तरलता अभावका कारण शेयर बजार अस्थिर बनिरहेका बेला बजारलाई नियमन गर्ने दुवै निकाय भने नेतृत्वविहीन छन् ।
नेपाल धितोपत्र बोर्ड (सेवन) र नेपाल स्टक एक्सचेन्ज (नेप्से)को प्रमुख पद रिक्त रहेकाे ३ महिना भइसक्दा पनि नयाँ नियुक्ति हुन सकेको छैन ।
सर्वोत्तम सिमेन्टको शेयर खरिद प्रकरणमा मुछिएपछि नेप्सेका तत्कालीन प्रमुख कार्यकारी अधिकृत (सीईओ) चन्द्रसिंह साउदले राजीनामा दिएका थिए भने सेवनका अध्यक्ष भीष्मराज ढुंगानालाई भने अर्थ मन्त्रालयले बर्खास्ती गरेको हो ।
नेप्से सीईओ साउदले ८ भदाैमा राजीनामा दिएका थिए । त्यसपछि ११ असोजमा बोर्ड अध्यक्ष ढुंगानाले राजीनामा दिएका थिए । अर्थ मन्त्रालयले सेवनको अध्यक्ष नियुक्तिका लागि ११ कात्तिकमा खुला प्रतिस्पर्धाबाट पदपूर्तिका लागि आवेदन मागेको थियो तर मन्त्रालयले छनोट प्रक्रिया भने अघि बढाएको छैन ।
यसैगरी नेप्सेको सीईओ नियुक्तिका लागि भने कुनै प्रक्रिया नै सुरु हुन सकेको छैन । बोर्ड नेतृत्वविहीन हुँदा कम्पनीहरूको शेयर निश्कासन स्वीकृतिसमेत रोकिएको छ ।