लोकसंवाद संवाददाता | खेलकुद | पुष ९, २०७८
लिगकै सर्वाधिक ६ गोल निस्किएको खेलमा विभागीय एपीएफ क्लब र न्युरोड टिम एनआरटीले अंक बाँडेका छन् ।त्रिपुरेश्वरस्थित दशरथ रंगशालामा शुक्रबार भएको पहिलो खेलमा एपीएफ र एनआरटीले ३-३ गोलको बराबरी खेल्दै अंक बाँडेका हुन् ।
लिगकै सर्वाधिक गोल निस्किएको खेलमा एपीएफका लागि आशिष लामा, दीपेश धिमाल र नवीन लामाले १-१ गोल गरे ।एनआरटीका लागि दर्शन गुरुङले २ गोल गर्दा मेसौके ओलोमोउले १ गोल गरे ।
सुरुवाती अग्रता बनाएको एनआरटी दोस्रो पटकसमेत अग्रता बनाउँदा जीतबाट बन्चित भयो । ७ अंक जोडेको एनआरटी छैटौँ स्थानमा छ । ५ अंक बनाएको एपीएफ ११औँ स्थानमा यथावत् छ ।
अहिले साँझ पौने ५ बजे हुने दोस्रो खेलमा नेपाल पुलिस क्लब र फ्रेन्ड्स क्लबबीच प्रतिस्पर्धा हुनेछ । पुलिस ५ खेलमा ५ अंक जोडेर दशौँ स्थानमा छ । फ्रेन्ड्सलाई हराएर पुलिस अंक तालिका सुधार्ने योजनामा छ ।
फ्रेन्ड्स ५ खेलमा २ अंक जोडेर पुछारमा छ । पुलिसलाई हराएर फ्रेन्ड्स रेलिगेसन क्षेत्रबाट माथि उक्लन चाहन्छ ।
लिगमा १४ वटा टोलीले प्रतिस्पर्धा गरिरहेका छन् । पुछारका २ टोली रेलिगेसनमा पर्नेछन् । जारी लिगमा मनाङ-मर्स्याङ्दी क्लब शीर्ष स्थानमा छ ।