त्रिविका स्थगित परीक्षा फागुनमा हुने

त्रिविका स्थगित परीक्षा फागुनमा हुने

लोकसंवाद संवाददाता  |  शिक्षा  |  माघ १७, २०७८

कोरोना महामारीको तेस्रो लहरका कारण रोकिएका त्रिभुवन विश्वविद्यालयका विभिन्न संकायका परीक्षा आगामी फागुनमा हुने भएका छन् ।

सोमबार बसेको त्रिभुवन विश्वविद्यालयका पदाधिकारीको बैठकले यस्तो निर्णय गरेको हो । नेपालमा कोरोनाको नयाँ भेरिएन्ट ओमिक्रोन फैलिएसँगै त्रिविले ९ माघदेखि परीक्षा स्थगित गर्ने निर्णय गरेको थियो । केही दिनयता कोभिड संक्रमण घट्दो क्रममा रहेकाले स्थगित परीक्षाबारे निर्णय गर्न आज त्रिवि पदाधिकारीको बैठक बसेको हो ।

‘स्थगित गरिएका लिन बाँकी रहेका सम्पूर्ण परीक्षाहरू फागुन महिनामा संचालन गरेर सक्ने गरी तालिका सार्वजनिक गर्छौं’, त्रिविका परीक्षा नियन्त्रक पुष्पराज जोशीले बैठकपछि भने । 

काेभिड संक्रमण बढेसँगै  त्रिवि, पूर्वाञ्चल विश्वविद्यालय, सुदूरपश्चिम विश्वविद्यालयले बीचमै परीक्षा स्थगित गरेका थिए ।