लोकसंवाद संवाददाता | समाचार | फाल्गुन ६, २०७८
पाँचथर । पाँचथर जिल्लामा १६ हजार एक सय ४१ नयाँ मतदाता थपिएका छन् । जिल्लाका स्थानीय तहमै पुगेर निर्वाचन कार्यालय पाँचथरले मतदाता नामावली संकलन गरेपछिको प्रारम्भिक तथ्याङ अनुसार पछिल्लो पटक त्यतिको मतदाता थपिएका हुन् । पछिल्लो तथ्याङ्क अनुसार जिल्लामा एक लाख ४१ हजार ३ सय ६२ जना मतदाता पुगेको जिल्ला निर्वाचन कार्यालय पाँचथरले जनाएको छ ।
पाँचथरमा २०७४ सालमा एक लाख २५ हजार २ सय २१ जना मतदाता थिए ।
जिल्ला निर्वाचन कार्यालय पाँचथरका अनुसार दुई चरणमा सम्पन्न गरेको मतदाता नामावली संकलन अभियान र जिल्ला प्रशासन कार्यालय मार्फत निरन्तर दर्ता भएका नामावलीले उक्त परिणाम ल्याएको हो ।
थपिएका मतदातामा सबै भन्दा बढी फिदिम नगरपालिकामा ४ हजार ९ सय ३ नयाँ मतदाता थपिएका छन् भने सबै भन्दा कम तुम्बेवा गाउँपालिकामा ५ सय ५७ मतदाता थपिएका छन् ।
त्यस्तै मिक्लाजुङ गाउँपालिकामा एक हजार ८ सय ३३, फाल्गुननन्द गाउँपालिकामा २ हजार ९ सय ७०, कुम्मायक गाउँपालिकामा एक हजार एक सय ५९ जना, फालेलुङ गाउँपालिकामा, २ हजार ४ जना, याङवरक गाउँपालिकामा एक हजार ६ सय ८० र हिहिहाङ गाउँपालिकामा एक हजार ८ सय ४५ जना नयाँ मतदाता थपिएका छन् ।
यो प्ररम्भिक तथ्याङ्क मात्र रहेको जिल्ला निर्वाचन कार्यालयका प्रमुख कुमारप्रसाद भट्टराईले बताए ।
अहिलेको प्रारम्भिक तथ्याङ्क भएको र अद्यावधिक गर्न बाँकी रहेको निर्वाचन कार्यालयका प्रमुख भट्टराईले बताए ।