लोकसंवाद संवाददाता | समाचार | जेठ ४, २०७६
सप्तरी । समुदाय र प्रहरी मिलेर सप्तरीको सप्तकोशी नगरपालिकामा नयाँ प्रहरी चौकी निर्माण गरिएको छ । प्राप्त नगद तथा स्थानीय समुदायको श्रमदान गरी ३८ लाख ६० हजार ३२४ को लागतमा सो चौकी निर्माण गरिएको हो ।
प्रदेश नं २ का प्रहरी नायब महानिरीक्षक हरिबहादुर पालले सप्तकोशी नगरपालिका–१ फत्तेपुरस्थित सुविधासहितको नवनिर्मित सो चौकी उद्घाटन गरे ।
आफ्नो भवन नहुँदा अति पुरानो भवनमा बसेर काम गर्नुपर्दा प्रहरी नै असुरक्षित भएपछि २०७० सालदेखि स्थानीयवासी र प्रहरी मिलेर भवन निर्माण गर्न थालेका थिए ।नयाँ भवन निर्माणका लागि जिल्ला प्रहरी कार्यालयले रु १३ लाख ४४ हजार उपलब्ध गराएको भवन निर्माण समितिका संयोजक अशोककुमार चौधरीले जानकारी दिए ।
उनका अनुसार भवन निर्माणका लागि सप्तकोशी नगरपालिकाले १३ लाख सहयोग गरेको र स्थानीयवासीले पाँच लाख ६० हजार ४६५ चन्दा सङ्कलन गरेका थिए ।
दुई कट्ठा १६ धुरमा फैलिएको दुईतल्ले भवनमा कार्यालयका प्रमुख कक्ष, प्रशासनिक कक्ष, महिला तथा पुरुषका छुट्टाछुट्टै हिरासत कक्ष, प्रहरी कर्मचारीको ब्यारेक र भान्छा घरसहित १० वटा कोठा छन् । रासस