लोकसंवाद संवाददाता | समाचार | जेठ ५, २०७६
काठमाडौं । जल तथा मौसम विज्ञान विभागले आगामी तीन दिन देशका केही ठाउँमा हावाहुरीसहित वर्षा हुने पूर्वानुमान गरेको छ ।
विभागका अनुसार आइतबार दिउँसो देशका पहाडी भू–भागमा आंशिकदेखि सामान्यसम्म बदली हुने र बाँकी भागमा आंशिक बदली रहने सम्भावना छ । ‘देशका थोरै स्थानमा अपरान्हपश्चात मेघ गर्जन र हावाहुरीसहित क्षणिक वर्षाको सम्भावना छ,’ विभागको वेबसाइडमा उल्लेख छ ।
यस्तै, सोमबार दिउँसो देशका पहाडी भू–भागमा आंशिकदेखि सामान्यसम्म बदली हुने, पूर्वी तराईका भू–भागमा आंशिक बदली र बाँकीमा मौसम सफा हुने विभागले जनाएको छ । विभागका अनुसार पूर्वी तराईका थोरै स्थानमा मेघ गर्जनसहित क्षणिक वर्षाको सम्भावना छ ।
मंगलबार दिउँसो देशका पहाडी भू–भागमा आंशिकदेखि सामान्यसम्म बदली हुने, बाँकीमा आंशिक बदली हुने सम्भावना छ । यस्तै, देशका पहाडी भू–भागलगायत पूर्वी तराईका थोरै स्थानमा मेघ गर्जनसहित क्षणिक वर्षाको सम्भावना रहेको विभागले जनाएको छ ।