लोकसंवाद संवाददाता | लोकरञ्जन | चैत्र ४, २०७८
सामाजिक सद्भाव र माधुर्य झल्काउने फागु पर्व फाल्गुण शुल्क पूर्णिमाका दिन मनाइन्छ । फागु अर्थात् होली पर्व यस पटक उपत्यकामा बिहीबार मनाइयो । तराईमा शुक्रबार मनाइँदै छ । होलीमा रङलाई एकआपसमा सद्भावको प्रतीकका रूपमा लगाइने गरिन्छ । वसन्त ऋतुको आगमन र हेमन्त ऋतुलाई बिदाइ गर्ने यस पर्वमा होली गीतहरूमा रङप्रेमी झुम्ने गरेका छन् । रङप्रेमीहरूले प्रत्येक वर्ष सम्झिने होलीमा आधारित नेपाली फिल्ममा समावेश केही गीत बिहीबार पहाडी भेगमा घन्किए । यी गीतहरू आज तराईमा घन्किनेछन् ।
सीता : जनकपुर मे होली हे
होलीलाई विशेष रूपमा मनाइने मिथिला अर्थात् जनकपुरमा शनिबार होली मनाइँदै छ । जनकपुरको आसपासमा छायांकन गरिएको फिल्म हो सीता । नेपाली फिल्ममा समावेश सदाबहार होलीका गीतहरूमा पर्छ- ‘जनकपुर मे होली हे ।’ यस गीतमा शम्भुजित बाँस्कोटाले संगीत दिएका छन् । गीतमा अभिनेता श्रीकृष्ण श्रेष्ठ र सारंगा श्रेष्ठ फिचर्ड छन् । अशोक शर्माको निर्देशनमा तयार भएको फिल्म अधिकांश जनकपुरमै छायांकन गरिएको थियो ।
अधिकार : होलीले रंगायो मेरो नयाँ चोली
होलीमा घन्किने गीतमा पर्छ- ‘होलीले रंगायो मेरो नयाँ चोली ।’ अधिकार फिल्मको यस गीतमा होलीकै प्रसंग छ । प्रकाश थापा निर्देशित फिल्मको यस गीतमा पनि संगीत शम्भुजित बाँस्कोटाले दिएका छन् । गीतमा शब्द किरण खरेलले कोरेका हुन् भने यसमा उदितनारायण झा, दीपानारायण झा, प्रकाश श्रेष्ठ, पूर्णिमा श्रेष्ठको स्वर छ । गीतमा राजेश हमाल, कृष्टि मैनाली, मिथिला शर्मालगायतको अभिनय छ ।
वसन्ती : फागु हो फागु हो
होली आएपछि जताततै सुनिने नेपाली गीतमा पर्छ- ‘फागु हो फागु हो ।’ निर्देशक नीर शाह निर्देशित फिल्म ‘वसन्ती’मा समावेश यो गीत गुञ्जायमान भएसँगै होली आएको आभास हुन्छ । गीतको शब्द पनि नीर शाह आफैँले लेखेका हुन् । संगीत शम्भुजित बाँस्कोटाकै छ । गीतमा निरुता सिंह, करिश्मा मानन्धरलगायतका कलाकारले अभिनय गरेका छन् ।
संरक्षण : होरी मे गोरी
पूर्णेन्दु झा निर्देशित फिल्म संरक्षणमा समावेश ‘होरी मे गोरी’ बोलको गीत तराई क्षेत्रमा निकै बज्ने गरेको छ । यस गीतले होली तराईमै मनाइरहेको दृश्यलाई समेटेको छ । नेपाली फिल्म भए पनि तराईमा होली सन्दर्भलाई कैद गरेकै कारण यो गीत भोजपुरी भाषामा छ । गीतमा नेहा प्रियादर्शन र प्रवेश मल्लिकको आवाज, धीरेन्द्र प्रेमर्षीको शब्द र संगीत प्रवेश मल्लिकको छ । सौगात मल्ल, मलिना जोशी र अशिष्मा नकर्मी गीतमा फिचर्ड छन् ।
फागु : आऊ न आऊ खेलौँ होली
अभिनेत्री करिश्मा मानन्धरको निर्माण तथा सम्झना उप्रेती रौनियारको निर्देशन रहेको फिल्म फागुमा ‘आऊ न आऊ खेलौँ होली’ गीत समावेश छ । गीतमा दयाराम पाण्डेको शब्द छ भने बसन्त सापकोटाले संगीत दिएका छन् । गीतमा मीना निरौला, मनोज महतो, रञ्जितकुमार सहानीको स्वर छ । फिल्मका प्रमुख कलाकारमा शिल्पा पोखरेल र सुवास पराजुली छन् ।