लोकसंवाद संवाददाता | समाचार | चैत्र १५, २०७८
स्थानीय तहको निर्वाचनमा गठबन्धन गरेर जानुपर्ने सभापति शेरबहादुर देउवाको मतको पक्षमा अधिकांश केन्द्रीय सदस्य उभिएपछि गठबन्धन निर्माणका लागि संयन्त्र बनाउने कोसिस भएको छ ।
प्रतिपक्ष नेकपा एमाले बलियो भएको तर्क राख्दै कांग्रेस सभापति देउवाले गठबन्धनमा जोड दिएपछि सत्तारुढ दलसँग गठबन्धन गर्नका लागि अलग्गै संयन्त्र निमार्ण गर्ने कोसिस भएको हो ।
अलग्गै संयन्त्र निर्माण गरेर जाने कि नजाने भन्नेबारेमा कांग्रेस शीर्ष नेताहरूका बीचमा छलफल जारी राखिएको केन्द्रीय सदस्य नैनसिंह महरले जानकारी दिए ।
‘केन्द्रबाट नै गठबन्धनको निर्णय गरेर जाने भन्दा पनि स्थानीय तहले आवश्यकताका आधारमा तालमेल गर्ने अधिकार दिनुपर्छ भन्ने अधिकांशको धारणा बैठकमा प्रस्तुत भएको छ’, केन्द्रीय सदस्य महरले भने, ‘त्यसका लागि स्थानीय तह, जिल्ला र प्रदेशस्तरमा नै एउटा अलग्गै समन्वयात्मक संयन्त्र बनाउने र त्यसको सुझावका आधारमा निर्वाचनमा तालमेल गर्न सकिने मोडलका बारेमा कुराकानी भइरहेका छन् ।’ उनका अनुसार सोबारेमा सभापति देउवाले शीर्ष नेताहरूसँग राय-सुझाव लिइरहेका छन् ।