लोकसंवाद संवाददाता | खेलकुद | चैत्र २२, २०७८
चर्च ब्वाइज युनाइटेड मंगलबार बिहान बाँसबारी युथ क्लबलाई ५-१ अन्तरले पराजित गर्दै शहीद स्मारक ‘बी’ डिभिजन लिग विजेताको हैसियतमा ‘ए’ डिभिजन लिगमा बढुवा भएको छ ।
सातदोबाटोस्थित एन्फा कम्प्लेक्समा सम्पन्न दिनको पहिलो खेलमा चर्च ब्वाइजको जीतमा साइमन लिम्बूले ह्याट्रिकसहित ४ गोल गर्दा आशिष चौधरीले १ गोल गरे ।
सातौँ मिनेटमा साइमनले गरेको गोलमा चर्च ब्वाइजले अग्रता लियो । १७औँ मिनेटमा विवेक पौडेलको पासमा आशिष चौधरीले गोल गर्दै चर्च ब्वाइजको अग्रता दोब्बर पारे ।
३७औं मिनेटमा साइमनले चर्च ब्वाइजको अग्रता ३-० मा पुर्याए । त्यसको चार मिनेटपछि नै साइमनले पेनाल्टीको सदुपयोग गर्दै चर्च ब्वाइजको अग्रता फराकिलो बनाए । बाँसबारीका सञ्जिव धिमालले ५८औं मिनेटमा एक गोल फर्काए ।
खेल सकिन ९ मिनेट बाँकी रहँदा साइमनले पेनाल्टीको सदुपयोग गर्दै चर्च ब्वाइजको ५-१ को विजयी गोल गरे ।
२०७५ सालमा ‘सी’ डिभिजन छनोटबाट ‘सी’ डिभिजनमा बढुवा भएको चर्च ब्वाइज पहिलो सिजनमै विजेताको हैसियतमा ‘बी’ डिभिजनमा उक्लिएको थियो । ‘बी’ डिभिजनमा उक्लिएको पहिलो वर्ष नै चर्च ब्वाइज एक खेल अगावै शीर्ष डिभिजनमा बढुवा भएको हो ।
यसअघि मनाङ-मर्स्याङ्दी, थ्री स्टार र हिमालयन शेर्पाले पनि पहिलो सिजनमै ‘डी’ डिभिजनबाट 'सी', 'सी' डिभिजनबाट 'बी' र 'बी' डिभिजनबाट शीर्ष डिभिजनको टिकट काटेका थिए ।
शीर्ष स्थानको चर्च ब्वाइजको १२ खेलमा २६ अंक छ, जुन दोस्रो स्थानको रानी पोखरी टिम (आरसीटी)भन्दा ८ अंक बढी हो । तेस्रो स्थानको सरस्वती युथ क्लबको १७ अंक छ ।
आरसीटी र सरस्वती 'ए' डिभिजनमा पुनरागमनको लक्ष्यमा छन् ।