लोकसंवाद संवाददाता | समाचार | जेठ २९, २०७९
काठमाडौं महानगरपालिकाले थप १० वटा नयाँ स्मार्ट शौचालय संचालनमा ल्याउने भएको छ ।
सार्वजनिक शौचालय नहुँदा सर्वसाधारणले सास्ती खेप्नुपरेपछि महानगरपालिकाले १० वटा सार्वजनिक स्मार्ट शौचालय संचालन गर्न लागेको हो ।
‘छिट्टै स्मार्ट ट्वाइलेट सुचारु हुन्छ । १० वटा नयाँ ट्वाइलेट संचालनमा ल्याइनेछ’, आइतबार बसेको काठमाडौं महानगरपालिकाको दोस्रो कार्यपालिका बैठकमा बोल्दै महानगरका प्रमुख बालेन्द्र साहले भने ।
काठमाडौं महानगरभित्रका केही संस्थाहरूले आफ्ना शौचालयहरू स्वस्फुर्त रूपमा सर्वसाधारणलाई प्रयोग गर्न दिने निर्णय गरेको उनले बताए ।
यस्ता संस्थाहरूले कार्यालय समयमा आफ्नो शौचालय सर्वसाधारणलाई पनि प्रयोग गर्न दिने उनले जनाए । शौचालय प्रयोग गर्न दिने संस्थालाई कर छुट नदिइनेसमेत उनले बैठकमा स्पष्ट पारे ।
आफ्नो शौचालय सर्वसाधारणलाई प्रयोग गर्न दिने संस्थाहरूलाई हरेक ४/४ महिनामा महानगरले सरसफाइ सामग्री उपलब्ध गराउने उनले बताए ।