टेकबहादुर थापा 'बुद्धप्रिया' | साहित्य | पुष २९, २०७९
चुनाव आयो भने मात्र गाउ फर्की आउने
अरुबेला रातो-दिन शहर बजार धाउने
ठेक्का पट्टा कमिसनले परिवार पाल्ने
यिनले भोट नहारे र कसले हो त हार्ने ?
गाउँघरमा आउँदा पनि टाई-सुट मै आउने
ससुराली जादा पनि हेलिकप्टर चाहिने
गरि खाने जनताको कुरै नसुन्ने
यस्ताले भोट नहारेर कस्ताले हो हार्ने ?
छोरी,चेली जस्तै सधैं क्रिम पाउडर घस्ने
नङ काट्न नसकेर ह्यान्डसम पार्लर पस्ने
माछा, मासु बिना त भान्सै नबस्ने
यिनले भोट नहारेर कसले हो त हार्ने ?
चुनाव जिति गएपछि फर्की नआउने
जनताको पक्षमा माखो नमार्ने
सुरा पान, सुन्दरी मै मस्ती सधैं मार्ने
यिनले भोट नहारेर कसले हो त हार्ने ?
पार्टी भन्दा बाहिरका लाई वास्तै नगर्ने
सानो काम लगायो कि कमिसन माग्ने
आफ्नै कार्यकर्तालाई नि दास,दासी ठान्ने
यिनले भोट नहारेर कसले हो त हार्ने ?
देशभक्ति र राष्ट्रवादको कुरा पनि गर्ने
राष्ट्रघाती सन्धी गर्न अधि पनि सर्ने
एमसिसीको कमिसनले राजनीति गर्ने
यिनले भोट नहारेर कसले हो त हार्ने ?
मतदाताहरु लाई अपमानित गर्ने
भोट हुनु भन्दा पहिला भगवान भन्ने
भोट पाइसके पछि भेडाबाख्रा ठान्ने
यिनले भोट नहारे कसले हो त हार्ने ?