लोकसंवाद संवाददाता | समाचार | फाल्गुन १६, २०७९
करिब दुई वर्ष लामो तिक्तता पूर्ण सम्बन्धलाई पूर्णविराम लगाउँदै एक ठाउँमा आइपुगेका एमाले अध्यक्ष केपी शर्मा ओली र माओवादी केन्द्रका अध्यक्ष पुष्पकमल दाहाल प्रचण्ड फेरि आरोप प्रत्यारोपको चरणमा आइपुगेका छन् ।
मंसिर ४ को आम निर्वाचनको परिणाम आएपछि सरकार गठनका क्रममा गत पुस १० गते धेरैलाई आश्चर्यचकित पार्दै दाहाल र ओली एकठाउँमा उभिएन आइपुगेका थिए । त्यसअघि हरेक मञ्चमा एकअर्काको उछित्तो काड्दै आएका दुई नेताको मिलन बालकोट बार्दलीदेखि खुमलटारको सुन्तला छोडाउन र घाम ताप्नमा सीमित भएका दृश्य निकै रोचक देखिन्थे ।
तर यो सहकार्य अन्ततः २ महिनामै टुट्न पुगेको छ । सोमबार एमालेले सरकारलाई दिएको समर्थन फिर्ता लिँदै सरकारबाट बाहिरिएपछि प्रचण्ड–ओली सहकार्य औपचारिक रुपमा नै टुंगिएको छ ।
त्यसो त १२ फागुनमा प्रधानमन्त्री प्रचण्डले १० पुसको सहमति विपरीत एमाले उम्मेदवारलाई नसघाई काँग्रेस उम्मेदवार रामचन्द्र पौडेललाई राष्ट्रपतिमा सघाउने निर्णय गरेपछि यो गठबन्धन टुटेको अवस्थामा नै थियो । तर एमालेले सरकारमै रहेर २५ फागुनसम्म सहमतिका लागि पर्खिने निर्णय गरेर सरकारमा बस्ने सांकेतिक निर्णय गरेको थियो ।
राष्ट्रपति निर्वाचनले नयाँ गठबन्धन र परिस्थिति निर्माण गरेलगत्तै प्रधानमन्त्रीले एमाले मन्त्रीहरुलाई राजीनामा दिन वा विना विभागीय बनाउने चेतावनी दिएपछि सरकारबाट हटेको एमाले नेताहरुले बताएका छन् ।
त्यसमाथि पनि मन्त्रिपरिषद् बैठकबाटै परराष्ट्रमन्त्री विमला राई पौड्याललाई जेनेभा भ्रमणमा पठाउने निर्णय गरेको थियो । तर प्रधानमन्त्रीले आइतबार अचानक उनको भ्रमण रद्द गरेपछि एमालेका अध्यक्ष थप आक्रोशित बनेकाहुन । प्रधानमन्त्री प्रचण्डले मन्त्री पौडेलको भ्रमण रद्द गर्न निर्देशन दिएको भोलिपल्ट फागुन १५ गते एमालेले बैठकै राखेर प्रचण्डसँगको सत्ता सहकार्यलाई टुंग्याउने निर्णय पुग्यो ।
एमालेसहितका ७ दलको समर्थनमा प्रचण्ड पुस १० गते प्रधानमन्त्रीमा नियुक्त भएका थिए । पुस ११ गते प्रचण्ड नेतृत्वको सरकारमा एमाले सहभागी भएको थियो । एमालेका ८ मन्त्रीले सोमबारै प्रधानमन्त्री प्रचण्डलाई भेटेर सामुहिक राजीनामा बुझाएका छन् । एमाले र राप्रपाले सत्ता सहकार्य तोडे सँगै समर्थन फिर्ता लिएपछि अब प्रधानमन्त्री पुष्पकमल दाहाल प्रचण्डले फेरि संसदबाट विश्वासको मत लिनुपर्ने ठाउँमा आइपुगेका छन् ।
यद्यपि यस अघि विश्वासको मत लिंदाको अवस्थालाई हेर्ने हो भने प्रधानमन्त्रीले अझै बहुमत गुमाएका छैनन् । राष्ट्रिय स्वतन्त्र पार्टी (रास्वपा) ले समर्थन फिर्ता लिएको छैन भने १० पुसमा बनेको गठबन्धनमा रहेको १२ सिट रहेको जनता समाजवादी पार्टी, ६ सिट रहेको जनमत पार्टी र ४ सिट रहेको नागरिक उन्मुक्ति पार्टी अझै प्रचण्डको साथमा नै रहेका छन् । संसदको सबभन्दा ठूलो दल नेपाली काँग्रेसका ८९, एकीकृत समाजवादीका १० र लोकतान्त्रिक समाजवादीका ४ सांसदको पनि समर्थन प्रचण्डलाई नै रहको छ ।
एमाले अध्यक्ष केपी शर्मा ओलीकै भाषामा २६ पुसमा प्रधानमन्त्रीलाई विश्वासको मत दिएर काँग्रेसले थापेको ढोक्सामा अन्ततः माछा पार्न सफल भएको छ । ढोक्साको कहानी सुनाउने एमाले अध्यक्ष केपी ओली भने अन्ततः खाली ढोक्सा लिने वा थाप्ने अवस्थामा पुगेका छ
उनले २६ पुसमा आफूलाई विश्वासको मत दिएको काँग्रेसलाई साथ लिएर सरकार चलाउने तयारीमा छन् । यसले अबको प्रचण्डको बाटोलाई सहज भन्दा चुनौतीपूर्ण नै बनाइदिएको छ भने दुई महिना पनि गठबन्धन नटिक्नमा एमाले नेताहरुले प्रचण्डलाई दोषी देखाएका छन् । उनले आफ्नो फाइदाका लागि गठबन्धन फेरेको आरोप लगाएका छन् । प्रचण्डको अस्थिर नेताको छवि स्थापित भएको रुपमा एमालेले प्रचार-प्रसारलाई तिब्र बनाउने निश्चित छ ।
प्रतिपक्षी बन्न नपाएको काँग्रेस
पछिल्ला दुई महिना नेपाली राजनीतिमा निकै तीव्र रुपमा घटनाक्रमहरू विकास भए । सत्ता सहकार्यमा रहेका एमाले र माओवादीले लुम्बिनीबाट एक जनालाई राष्ट्रिय सभामा जिताए भने प्रतिनिधिसभाको सभामुख र उपसभामुख पनि आफू अनुकूल जिताएका थिए । ९ पुससम्म प्रतिपक्षमा बस्न तयार रहेको एमाले १० पुसमा सत्ता पक्षमा पुग्यो
त्यसबेलासम्म सत्ताको नेतृत्व गर्ने तयारीमा रहेको काँग्रेस प्रतिपक्षी बनेको थियो । २६ पुसमा प्रधानमन्त्रीलाई विश्वासको मत दिएपछि काँग्रेस प्रमुख प्रतिपक्षी बन्छ कि बन्दैन भन्ने चासो सर्वोच्च अदालतमा समेत पुगेको थियो ।
नेपाली कांग्रेसलाई प्रमुख प्रतिपक्ष दलको मान्यता दिन नहुने मागसहित सर्वोच्च अदालतमा परेको रिट विचाराधीन अवस्थामा छ । तर राजनीतिक घटनाक्रमले कांग्रेस प्रतिपक्षबाट सत्तारुढ बन्ने र सत्तामा रहेको एमाले प्रतिपक्षी बन्ने अवस्था सिर्जना भएको छ ।
यसको अर्थ काँग्रेसले संसदमा प्रतिपक्षी भूमिका खेल्न नपाउँदै सत्ता पक्षमा आइपुग्ने अवस्था बनेको छ । जसले प्रतिपक्षी नेताको माग गर्दै अदालतको ढोका ढक्ढक्याएका थिए, उनीहरुले भने फेरि त्यो भूमिका नपाउने अवस्था बनेको छ ।
एमाले अध्यक्ष केपी शर्मा ओलीकै भाषामा २६ पुसमा प्रधानमन्त्रीलाई विश्वासको मत दिएर काँग्रेसले थापेको ढोक्सामा अन्ततः माछा पार्न सफल भएको छ । ढोक्साको कहानी सुनाउने एमाले अध्यक्ष केपी ओली भने अन्ततः खाली ढोक्सा लिने वा थाप्ने अवस्थामा पुगेका छन् ।
अब सरकारमा पनि एमालेको ठाउँमा काँग्रेसले ठाउँ पाउनेछ । सरकारमा जान कांग्रेस पनि ढिला नगर्ने पक्षमा छ । काँग्रेसबाट पूर्णबहादुर खड्काले सरकारमा नेतृत्व गर्ने सम्भावना छ । उनले यसअघि नै मन्त्री नहुने घोषणा गरे पनि उपप्रधानमन्त्री र कुनै महत्वपूर्ण मन्त्रालयमा उनी जाने सम्भावना छ ।
उनीसँगै विमलेन्द्र निधि र प्रकाशमान सिंह पनि सरकारमा पार्टीबाट नेतृत्व गरेर जाने आकांक्षी पत्र हुन् । किशोर सिंह राठोर, प्रदीप पौडेल, एनपी साउद, बीरबहादुर बलायर, मोहन बस्नेत, रामहरि खतिवडा समेत मन्त्रीका आकांक्षी छन् ।
तेह्रथुमबाट प्रत्यक्ष चुनाव जितेकी एकमात्रै नेतृ सीता गुरुङ सरकारमा जाने सम्भावना छ । महामन्त्रीद्वय गगन थापा र विश्वप्रकाश शर्माले मन्त्री बन्न अनिच्छा देखाएका छन् । संस्थापनइतरबाट बद्री पाण्डे, सञ्जय गौतम, डिगबहादुर लिम्बु, रामनाथ अधिकारी पनि मन्त्री बन्ने लाइनमा छन् ।