लोकसंवाद संवाददाता | समाचार | जेठ २०, २०७६
काठमाडौं, एजेन्सी । अमेरिकाको स्यान्डियागो स्थित एक अस्पतालमा वजन तथा शरीरको हिसाबले संसारको सबैभन्दा सानो शिशुको जन्म भएको छ । नवजात बालिका सेबाईको जन्मदाँ तौल २४५ ग्राम थियो भने शरीर स्याउ भन्दा पनि सानो भएको अस्पतालले जनाएको छ ।
अमेरिकाको आइओवा विश्वविद्यालयको साना शिशुको दर्ता किताबमा उनको नाम संसारमा जीवित सबैभन्दा सानो शिशुको रुपमा रहेको छ ।
स्यान्डियागोको शार्प मैरी बिर्च अस्पतालका अनुसार आजभन्दा पाँच महिना अघि, डिसेम्बर २०१८ मा शिशुको जन्म भएको हो । जन्मिएको पाँच महिनासम्म उनको उपचार चलेको थियो । अहिले शिशुको अवस्थामा सुधार आएपछि अस्पतालले उनलाई घर पठाएको छ ।
सेबाईको जन्म गर्भ रहेको २३ हफ्तामा भएको थियो । जबकि एउटा सामान्य शिशुको जन्मको समय भनेको ४० हफ्ता हो ।
शिशुको तौल अत्यन्त कम भएका कारण डाक्टरले उनका बाबुलाई बालिकालाई हेर्ने समय भनेको केवल एक घण्टामात्रै हो भनेका थिए ।
अस्पतालले शिशुको आमाको एक भिडियो पनि जारी गरेको छ । भिडियोमा उनले भनेकी छन्, डाक्टरले शिशु एक घण्टासम्म मात्र जीवित रहन सक्ने बताएका थिए । तर बिस्तारै डाक्टरको कोशिशले एक घण्टा, दुई घण्टा हुँदै बच्ची केही दिन तथा केही हफ्तासम्म जीवित रहन सफल भइन् । डाक्टरहरुलाई पनि शिशु जीवित रहनेमा आशंका भएका कारण उनको जीवन घण्टा, दिन र हफ्तामा गणना गरिएको हो ।
अस्पतालको आईसीयुमा पांच महीना राखेपछि शिशुको तौल २.२ किलो पुगेको थियो त्यसपश्चात उनलाई डिस्चार्ज गरिएको थियो ।
अस्पतालमा सेबाईको रेखदेख गर्ने नर्स किम नोर्बीका अनुसार शिशु जीवित रहनु कुनै चमत्कार भन्दा कम होइन् ।
अर्की एक नर्स एमाका अनुसार सेबाई जन्मँदा यति सानो थिइन कि विच्छ्यौनामा देखिने पनि थिएन । उनी यति सानी थिइन कि हत्केलामै हराउँथिन, एमाले भनिन् ।
यसभन्दा अघि अक्टोबर २०१८ मा टोकियोको एक अस्पतालमा सबैभन्दा कम वजन भएको बच्चाको जन्म भएको थियो । जन्मँदा बालकको तौल २५८ ग्राम थियो । ६ महिना सम्मको उपचार पछि बालकको तौल ३ किलो पुगेको थियो ।
यसभन्दा पहिले पनि यो रेकर्ड जापानको एक बालकको नाममा थियो, जन्मँदा उनको तौल २६८ ग्राम थियो ।