लोकसंवाद संवाददाता | साहित्य | भदौ ३१, २०८०
बाँके। १५८ औँ मोती जयन्तीको अवसरमा नेपाल प्रज्ञा-प्रतिष्ठानका प्राज्ञ सभा सदस्य शशिराम कार्कीद्वारा लिखित महाकाव्य 'देवरात' को विमोचन तथा विमर्श कार्यक्रम सम्पन्न भयो ।
कार्यक्रमका प्रमुख अतिथि लुम्बिनी प्राविधिक विश्व विद्यालय सेवा आयोगका सदस्य डा. कृष्ण प्रसाद घिमिरेले देवरात महाकाव्यको विमोचन गर्दै देवरात महाकाव्यले साहित्यिक क्षेत्रमा नेपालगन्जको इज्जत बढेको बताए ।
कार्यक्रमका विशिष्ट अतिथि कर्णाली प्रदेश योजना आयोगका सदस्य जीतबहादुर शाहले प्राज्ञ शशिराम कार्कीले पछिल्लो समयमा नेपाली साहित्यमा पुराएको योगदान महत्त्वपूर्ण रहेको बताए । प्रज्ञा-प्रतिष्ठानका प्राज्ञसभा सदस्य महानन्द ढकालले शशिराम कार्कीले छोटो समयमा नेपाली साहित्यमा कथा, कविता, उपन्यास हुँदै महाकाव्य प्रकाशन गरेर नेपाली भाषा साहित्यलाई पुराएको योगदान उदाहरणीय रहेको बताए ।
देवरातका समीक्षकद्वय डा. इन्द्रबहादुर भण्डारी र विरेन्द्र शाहीले कवि कार्कीले महाकाव्य मार्फत उठाएका विषयवस्तुहरू महत्त्वपूर्ण रहेको बताउँदै महाकाव्य रहर र लहडले लेखिने कुरा नभएको र देवरात महाकाव्यमा केही कमिकमजोरी रहेपनि कार्कीले लेख्नकै लागि मात्रै महाकाव्य नलेखेको विचार राखे ।
प्राज्ञ हरिप्रसाद तिमिल्सिनाद्वारा मोतीराम भट्टको साहित्यिक योगदानको चर्चा गरिएको कार्यक्रममा कृतिकार शशि राम कार्की र किरण आचार्यले मन्तव्य राखेको थिए ।
साहित्यकार चरित्रा शाह र भिम प्रज्वलले देवरात महाकाव्यका केही श्लोकहरू वाचन गरेर सुनाएको कार्यक्रममा महेन्द्र पुस्तकालयका अध्यक्ष वलराम यादवले सभापतिको मन्तव्य राख्दै पुस्तकालयले भाषा साहित्यको विकास र सम्बर्द्धनका लागि निरन्तर कोसिस गर्दै आएको बताए ।
कार्यक्रममा वरिष्ठ कथाकार प्राज्ञ सनत रेग्मी, प्राडा जनार्दन आचार्य, सुमित्रा न्यौपान, नवीन अभिलाषी, बि.पि. अस्तु, भिमवहादुर शाही, पङ्कज श्रेष्ठ , लक्ष्मी बस्याल, बालकृष्ण रेग्मी, बद्री ढकाल 'हिरामणि' लगायत चार दर्जन बढी साहित्यकारहरूको उपस्थिति रहेको थियो ।