लोकसंवाद संवाददाता | समाचार | जेठ २५, २०७६
काठमाडौँ । नेपाल सरकारले चार राष्ट्रका लागि चार जनालाई राजदूतमा सिफारिस गरेको छ । २०७६ साल जेठ २४ गते बिहीबार मन्त्रिपरिषदको बसेको बैठकले अस्ट्रेलियाका लागि महेश दाहाल, कतारका लागि नारद भारद्वाज, स्पेनका लागि दावाफुटी शेर्पा र बंगलादेशका लागि डा. वंशीधर मिश्रलाई राजदूत सिफारिस गरेको प्रधानमन्त्री कार्यालयले जानकारी दिएको छ ।
राजदूत सिफारिसमा सत्तारूढ नेकपाभित्रको शक्ति सन्तुलन मिलाइएको छ । सिफारिसमा परेका चार जना प्रधानमन्त्री एवं अध्यक्ष केपी ओली, अर्का अध्यक्ष पुष्पकमल दाहाल तथा वरिष्ठ नेता माधवकुमार नेपाल निकटका व्यक्ति हुन् । सरकारले राजदूत सिफारिस गरेको निर्णय औपचारिक रूपमा सार्वजनिक गरिसकेको छैन ।
तत्कालीन राजदूत लक्की शेर्पा फर्किएपछि खाली भएको ठाउँमा दाहाललाई सिफारिस गरिएको छ । नेपाल टेलिभिजनको अध्यक्ष भइसकेका दाहाल नेकपा अध्यक्ष दाहालका जिल्लावासी र नातेदार समेत हुनुहुन्छ।
भारद्वाज प्रधानमन्त्री ओलीकै प्रस्तावमा राजदूत सिरफारिसमा परेका हुन् । झापाकाण्डमा १२ वर्ष जेल परेका उनी त्रिभुवन विश्वविद्यालयको अंग्रेजी विषयको सहप्राध्यापकबाट अवकास प्राप्त व्यक्ति हुनुहुन्छ । पार्टी एकता हुनुअघि उनी तत्कालीन एमालेको विदेश विभागको सदस्यकव जिम्मेवारीमा हुनुहुन्थ्याे ।
राजदूत सिफारिस दावाफुटी शेर्पा पहिलो महिला सगरमाथा आरोही पासाङ ल्हामुकी छोरी हुनुहुनुछ । शेर्पा दुई महिनाअघि पासाङ ल्हामु प्रतिष्ठानको अध्यक्ष चुनिनु भएकाे थियाे । अमेरिकाबाट मास्टर्स डिग्री गर्नु भएकी शेर्पा संयुक्त राष्ट्रसंघीय विश्व खाद्य कार्यक्रममा काम गरिसक्नु भएकाे छ ।
अघिल्लो सरकारको पालामा नियुक्त राजदूत डा चोपलाल भुसाललाई सरकारले फिर्ता गरिएपछि रिक्त बंगलादेशकाे राजदुत पदामा भने डा. मिश्र पूर्वस्वास्थ्यमन्त्री तथा नेकपा नेता डा. वंशीधर मिश्रलाई सिफारिस गरिएकाे हाे । त्यसैगरि सरकारले इजरायलका लागि नेपाली राजदूत अञ्जान शाक्यलाई साइप्रसका लागि गैरआवासीय राजदूत नियुक्त गरेको छ ।