लोकसंवाद संवाददाता | खेलकुद | जेठ २७, २०७६
नयाँ दिल्ली । सिक्सर किंग’का रूपमा चिनिने भारतीय अलराउन्डर युवराज सिंहले अन्तर्राष्ट्रिय क्रिकेटबाट सन्यास लिएका छन् ।
उनले सोमबार पत्रकार सम्मेलनमार्फत् सन्यासको घोषणा गरेका हुन् ।
सन् २०११ मा टिमलाई एकदिवसीय विश्वकपको उपाधि जिताउन महत्वपूर्ण भूमिका निभाएका सिंहले लामो समयदेखि राष्ट्रिय टिमबाट खेल्न पाएका थिएनन् ।
सन्यास घोषणामा भावुक
सन्यास घोषणाका क्रममा उनी भावुक देखिएका थिए । उनले भने, ‘क्रिकेटको २५ औं तथा अन्तर्राष्ट्रिय क्रिकेटमा १७ वर्षको उतारचढावपछि मैले अगाडि बढ्ने फैसला गरेको छु ।’
उनले क्रिकेटबाट आफूले धेरै कुरा सिकेको बताएका छन् । ‘यो खेलले मलाई धेरै कुरा सिकाएको छ, जस्तो : कसरी लड्ने तथा लडेपछि पुन कसरी उठ्ने र अगाडि बढ्ने,’ उनले भने ।
उनले २०११ को विश्वकप जितेर बुबाको सपना पूरा गरेको बताए ।
यस्तो छ प्रदर्शन
उनले भारतका लागि ४० टेस्ट, ३०४ एकदिवसीय र ५८ टि–ट्वान्टी खेलेका छन् । उनले टेस्टमा १ हजार ९ सय, एकदिवसीयमा ८ हजार ७ सय १ र ११ टि–ट्वान्टीमा १ हजार १ सय ७७ रन बनाएका छन् । यस्तै, टेस्टमा ९, एकदिवसीयमा १११ र टि–ट्वान्टीमा २८ विकेट लिएका छन् ।
सन् २००७ को टि–ट्वान्टी विश्वकपमा उनले इग्ल्याण्डका तीव्र गतिका बलर स्टुअर्ट ब्राडविरुद्ध एक ओभरमा ६ छक्का प्रहार गरेका थिए । यसपछि उनले ‘सिक्सर किंग’को उपमा पाएका छन् ।