लोकसंवाद संवाददाता | खेलकुद | असार २, २०७६
काठमाडौं । एकदिवसीय विश्वकप क्रिकेटमा भारतले पाकिस्तानसँगको अपराजित यात्रा कायम गरेको छ ।
इग्ल्याण्डमा जारी प्रतियोगिता अन्तर्गतको आइतबार राती सम्पन्न खेलमा भारतले पाकिस्तानलाई ८९ रनले पराजित गर्यो । यो एकदिवसीय विश्वकप क्रिकेटमा भारतले पाकिस्तानमाथि पाएको सातौं जित हो ।
वर्षाले खेल बिथोलिएपछि डकवर्थ लुइस नियमका आधारमा ४० ओभरमा ३०१ रनको लक्ष्य पाएको पाकिस्तान २१२ रनमै समेटियो । पाकिस्तानका लागि फकर जमानले सर्वाधिक ६२ रन जोडे । ७५ बल खेलेका उनले ७ चौका र १ छक्का प्रहार गरे । यस्तै, बाबर आजमले ४८ रन जोड्दा कप्तान सर्फराज अहमदले १२ रन बनाए । इमाद वसिम र सादव खान क्रमशः ४६ र २० रनमा अभिजित रहे । अन्य खेलाडीले गतिलो प्रदर्शन गर्न सकेनन् ।
भारतका लागि कुलदीप यादव, हार्दिक पाण्ड्या र विजय शंकरले समान २ विकेट लिए ।
त्यसअघि टस हारेर ब्याटिङ गरेको भारतले निर्धारित ५० ओभरमा ५ विकेट गुमाएर ३३६ रनको विशाल स्कोर खडा गरेको थियो । टिमका लागि प्रारम्भिक ब्याट्सम्यान रोहित शर्माले सर्वाधिक १४० रन जोडे । ११३ बल खेलेका शर्माले आफ्नो पारीमा १४ चौका र ३ छक्का प्रहार गरे । अर्का प्रारम्भिक ब्याट्सम्यान केएल राहुलले ५७ रन बनाए । उनले ३ चौका र २ छक्का प्रहार गरे ।
यस्तै, कप्तान विराट कोहलीले ७७ रन जोडे । ६५ बल खेलेका उनले आफ्नो पारीमा ७ चौका प्रहार गरे । चौथो नम्बरमा ब्याटिङ गर्न आएका अलराउन्डर हार्दिक पाण्ड्याले १९ बलमा २६ रन बनाए । उनले २ चौका र १ छक्का प्रहार गरे । विजय शंकर १५ र केदार जाधव ९ रनमा अभिजित रहे ।
पाकिस्तानका मोहम्मद आमिरले ३ तथा हसन अली र वाहब रियाजले समान १ विकेट लिए ।
खेलको म्यान अफ दि म्याच रोहित शर्मा घोषित भए ।