लोकसंवाद संवाददाता | खेलकुद | असार १३, २०७६
काठमाडौं । इग्ल्याण्डमा जारी एकदिवसीय विश्वकप क्रिकेट प्रतियोगिताअन्तर्गत आज श्रीलंका र दक्षिण अफ्रिका प्रतिष्पर्धा गर्दैछन् । श्रीलंकाले टस हारेर ब्याटिङको निम्तो पाएको छ ।
सेमिफाइनलको सम्भावना कायम राख्न श्रीलंकालाई आजको खेल जित्न आवश्यक छ । आजको खेलमा पराजय भोगे श्रीलंकाको सेमिफाइनल यात्रा कमजोर बन्नेछ ।
त्यसकारण श्रीलंकालाई आजको खेल करो या मरोको स्थितिमा छ ।
चालू प्रतियोगितामा श्रीलंकाले ६ खेलबाट ६ अंक बटुल्दै अंकतालिकामा सातौं स्थानमा छ । श्रीलंकाले चालू प्रतियोगितामा दुई खेलमा जित हासिल गरेको थियो भने दुईमा नतिजा बाँडेको थियो ।
अंकतालिकामा अस्ट्रेलिया १२ अंकसहित शीर्ष स्थानमा छ । यस्तै, भारत ११ अंकसहित दोस्रो स्थानमा छ । न्युजिल्याण्ड तेस्रो स्थानमा छ । उसको पनि ११ अंक छ ।अंकतालिकाको चौथो स्थानमा रहेको इग्ल्याण्डको ८ अंक छ । पाँचौं र छैठौं स्थानमा क्रमशः बंगलादेश र पाकिस्तान छन् । दुवैको समान ७ अंक छ ।
आठौं, नवौं र दसौं स्थानमा क्रमशः वेस्ट इण्डिज, दक्षिण अफ्रिका र अफगानिस्तान छन् । यी तीनवटै टिम सेमिफाइनल यात्राबाट बाहिरिसकेका छन् ।
यस्तोमा आजको खेल फराकिलो अन्तरमा जिते श्रीलंका इग्ल्याण्डलाई पछि पार्दै चौथो स्थानमा पुग्न सक्छ ।
उता दक्षिण अफ्रिका सेमिफाइनल यात्राबाट बाहिरिसकेकाले साख जोगाउने रणनीतिमा छ । प्रतियोगिता सुरु हुनुअघि दाबेदारका रूपमा गनिएको दक्षिण अफ्रिकाको प्रदर्शन निराशाजनक देखिएको छ ।