एसिसी यु-१९ इस्टर्न रिजन क्रिकेट : नेपालद्वारा चीन पराजित

काठमाडौं । एसिसी यु-१९ इस्टर्न रिजन क्रिकेटमा नेपालले चीनलाई पराजित गर्दै प्रतियोगितामा सुखद् सुरुवात गरेको छ ।

मलेसियाको क्वालालम्पुरस्थित किनरा ओभल क्रिकेट मैदानमा आज भएको समूह चरणको आफ्नो पहिलो खेलमा नेपालले चीनलाई १० विकेटले पराजित गर्दै प्रतियोगितामा सुखद् सुरुवात गरेको हो । 

टस हारेर पहिले ब्याटिङको निम्तो पाएको चीनले नेपाललाई ५४ रनको सामान्य लक्ष्य दिएको थियो । ५४ रनको विजयी लक्ष्य बोकेर मैदान उत्रेको नेपालले पाँच ओभरमा कुनै पनि विकेट नगुमाई पूरा गर्यो ।

नेपालको लागि पवन सर्राफ सर्वाधिक ४६ रनको योगदान दिए । उनले २१ बलमा तीन छक्का र ६ चौकाको मद्दतमा ४६ रन बनाए । त्यस्तै रित गौतमले अविजित १० रन जोडे । जितसँगै नेपाल एक खेलअगावै सेमिफाइनलमा प्रवेश गरेको छ । 

चीन भने प्रतियोगिताबाट बाहिरिएको छ । समूह चरणमा दुई खेल खेलेको चीन दुवै खेलमा पराजित भएपछि प्रतियोगिताबाट बाहिरिएको हो । पहिलो खेलमा चीन सिंगापुरसँग पराजित भएको थियो ।  

त्यसअघि पहिले ब्याटिङ गरेको चीनले २३ दशमलव १ ओभरमा सबै विकेट गुमाउँदै ५३ रनमा समेटिएको थियो । चीनका लागि लियाङ चेन र गुओहाओले समान १३÷१३ रन जोड्नुबाहेक अन्यले दोहोरो अंक बटुल्न सकेनन् । 

बलिङतर्फ नेपालका सागर ढकाल एक्लैले ६ विकेट लिँदा तिलक भण्डारीले तीन तथा कमल सिंह ऐरीले एक विकेट झारे ।

नेपालले समूह चरणको अन्तिममा सिंगापुरसँग खेल्ने कार्यक्रम छ । उक्त खेल असार २० गते हुने राससमा उल्लेख छ ।