लोकसंवाद संवाददाता | समाचार | असार २७, २०७६
काठमाडौं । मुलुकका विभिन्न भागमा बिहीबार रातिदेखि परेको अविरल वर्षाले जनजीवन प्रभावित बनेको छ । प्रहरी प्रधान कार्यालयका अनुसार हालसम्म अविरल वर्षाका कारण राजधानी काठमाडौंसहित काभ्रेपलाञ्चोक, ललितपुर, रामेछाप, भोजपुर, मकवानपुर र पर्सामा ११ जनाले ज्यान गुमाएका छन् ।
कहाँ कतिले गुमाए ज्यान ?
काठमाडौं
मूलपानीमा घर पुरिँदा एकै परिवारका तीन जनाको ज्यान गएको छ । ज्यान गुमाउनेमा बारा घर भई कागेश्वर मनहरा नगरपालिकास्थित मूलपानीमा बस्दै आएका नतु यादव, सर्मिला यादव र कुन्दन यादव रहेको प्रहरीले जनाएको छ ।
काभ्रेपलाञ्चोक
प्रहरीका अनुसार बनेपा–३, नालामा पहिरोले घर पुरिँदा एकै घरका दुई जनाले ज्यान गुमाएका छन् । यस्तै, दुई घाइते भएका छन् ।
ज्यान गुमाउनेमा ५५ वर्षीय गोमा दंगाल र उनकी नातिनी ७ वर्षीय सोहनी छन् ।
रामेछाप
पहिरोले पुरिएर एक जनाको ज्यान गएको छ भने एक घाइते छन् । पहिरोमा पुरिएर ४५ वर्षीय पदमकुमार सुनुवारको ज्यान गएको प्रहरीले जनाएको छ ।
भोजपुर
अविरल वर्षाका कारण दुई जनाको ज्यान गएको छ । एकको पर्खालले च्यापिएर र अर्काका चर्पी पुरिएर ज्यान गएको हो । घरभित्र पानी पस्दा पर्खालले च्यापिएर ६६ वर्षीय जगतबहादुर राई ज्यान गएको छ ।
यस्तै, शौच गर्न गएका बेला चर्पी पुरिएर टेम्केमैयुङ गाउँपालिका–९, लेखर्कका १४ वर्षीय जनक बिकको ज्यान गएको छ ।
ललितपुर
अविरल वर्षाका कारण एक जनाको ज्यान गएको गृह मन्त्रालयले जनाएको छ । तर, मृतकको सनाखत हुन सकेको छैन ।
मकवानपुर
अविरल वर्षाका कारण थाहा नगरपालिका–३, स्थित महाभीर खोलामा आएको बाढीले एकको ज्यान गएको छ । खोलाले बगाउँदा घाइते भएकी बालिका सञ्चना बलामीको मृत्यु भएको प्रहरीले जनाएको छ ।
खोलाले बगाएपछि स्थानीयले उद्दार गरी अस्पताल पुर्याए पनि बालिकाको उपचारका क्रममा ज्यान गएको थियो ।
पर्सा
बाढीले बगाएर बालकको ज्यान गएको छ । पर्सागढी नगरपालिका–१, का १० वर्षीय निखिल पटेलको सिंग्याही खोलाको बाढीले बगाएर ज्यान गएको प्रहरीले जनाएको छ । प्रहरीका अनुसार पटेल बाढीले बगाएर ल्याएको दाउरा संकलन गर्न खोलामा पसेका थिए ।
वर्षाले मानवीय क्षति मात्रै होइन, भौतिक क्षति पनि पुर्याएको छ । वर्षाका कारण मुलुकभरका विभिन्न ठाउँमा निर्माण संरचनामा क्षति पुगेको छ । तर, यसको विस्तृत विवरण आइसकेको छैन ।