लोकसंवाद संवाददाता | समाचार | असार ३१, २०७६
काठमाडौं, एजेन्सी । चीनको आर्थिक वृद्धिदर (जीडीपी) यो वर्षको अप्रिल–जुन महिनामा घटेर ६.२ प्रतिशत भएको छ ।
गएको २७ वर्षमा यो तीन महिना सबैभन्दा कम आर्थिक वृद्धिदर भएको महिनाको रुपमा देखा परेको छ ।
यो भन्दा कम आर्थिक वृद्धिदर १९९२ को जनवरी–मार्चमा रेकर्ड गरिएको थियो ।
यसवर्ष जनवरी–मार्चमा चीनकाे आर्थिक वृद्धिदर ६.४ प्रतिशत रहेको थियो ।
अमेरिका तथा चीनबीच जारी व्यापार युद्धका कारण चीनको आर्थिक वृद्धिदरमा कमी आएको हो । हाल चीन संसारको दोस्रो ठूलो अर्थतन्त्र हो ।
यस वर्षको पहिलो ६ महिनाको आर्थिक वृद्धिदर भने ६.३ प्रतिशत रहेको थियो । अमेरिकाले आयात शुल्क वृद्धि गरेका कारण चीनको निर्यात व्यापारमा गिरावट आएको हो ।
घरेलु माग घटेका कारण चीनको आयात पनि घटेको छ । अहिले विश्लेषकहरुको नजर भने रोजगारी दरमा रहेको छ ।
विशेषज्ञका अनुसार यदि अमेरिका–चीनका बीच व्यापार युद्ध जारी रहेका खण्डमा विश्व अर्थव्यवस्थामा मन्दी आउन सक्ने खतरा रहन्छ ।
जापानको मिजुहो बैंकका एशिया तथा ओसेनिया इकोनमिक्स प्रमुख विष्णु वराथनका अनुसार, अप्रैल–जुन तीन महिनामा चीनको कमजोर आर्थिक वृद्धिदरको असर बाँकी एशियामा पनि पर्नसक्छ ।
चीनकाे आयात तथा निर्यातमा कमी हुनु चिंताको विषय हो किनकि एशियाको बाँकी देशका लागि पनि चीन प्रमुख बाजार हो ।