लोकसंवाद संवाददाता | विदेश | श्रावण १३, २०७६
इथियोपिया, सिन्ह्वा । इथियोपियाले गत आर्थिक वर्षमा मात्र एक अर्ब २० करोड अमेरिकी डलरभन्दा बढी मूल्य बराबरको कफी र तेलहन वस्तु निर्यात गरेको छ ।
इथियोपियाबाट ठूलो मात्रामा कफी निर्यात हुने गर्दछ । इथियोपिया अरेबिका जातको कफी उत्पादन गर्ने एउटा प्रमुख अफ्रिकी मुलुक हो ।
मुलुकको अर्थतन्त्रको मुख्य आधार नै यहाँको कफी उत्पादन रहेको छ । आगामी पाँच वर्षभित्रमा कफी उत्पादनलाई १८ लाख टन पुर्याउने इथियोपिया सरकारले घोषणा गरेको छ ।
हाल इथियोपियामा करिब ६ लाख टन कफी उत्पादन हुँदै आएको छ । इथियोपियाली कफी तथा चिया प्राधिकरण (इसीटिए) का अनुसार आगामी दिनहरुमा कफीका लागि चीन प्रमुख बजार हुने अवस्था सिर्जना भएको छ ।
गत वर्ष अप्रिलमा चीन र इथियोपियाबीच चीनमा कफी निर्यात गर्नेसम्बन्धी एक समझदारी पत्रमा हस्ताक्षर समेत भइसकेको छ ।
इथियोपियाको प्रमुख निर्यात कृषिजन्य वस्तुमा तेलहन समेत रहेको छ । यी वस्तुको समेत चीन निर्यात गर्नेसम्बन्धी समझदारीमा हस्ताक्षर भएको छ ।
इथियोपियाली कृषिजन्य एवं अन्य सामानको प्रमुख निर्यात मुलुक चीन रहेको छ । इथियोपियाली व्यापार मन्त्रालयका अनुसार सन् २०१७–१८ को एक वर्षको अवधिमा इथियोपियाबाट चीनतर्फ २४ करोड ५० लाख अमेरिकी डलर बराबरको सामान निर्यात भएको थियो