लोकसंवाद संवाददाता | विदेश | भदौ १, २०७६
जापान । जापानको क्योटोस्थित एउटा ४ सय वर्ष पुरानो कोदाइजी मन्दिरमा रोबोटलाई पुजारीका रुपमा तैनाथ गरिएको छ ।
रोबोटको विशेषता के हो भने उसले मन्दिरमा आउने भक्तजनहरुलाई दया तथा करुणाको सन्देश प्रवाह गरिरहन्छ ।
मन्दिरमा रहेका अन्य पुजारीले रोबोट पुजारीलाई सहयोग गर्छन् । कृतिम बौद्धिकता (एआई) का कारण आगामी दिनमा रोबोट अझ अधिक बुद्धिमान हुने पनि उनीहरुको विश्वास रहँदै आएकाे छ ।
मन्दिरमा रोबोट पुजारी राख्ने विषयमा पुजारी तथा स्थानीयबीच निकै विवाद पनि भएको थियो । तर, पछि यो विषयमा सहमति बन्यो र अन्ततः मन्दिरमा रोबोट पुजारी राख्ने सहमति भएकाे थियाे ।
कोदाइजी मन्दिरका पुजारी थेनसे गोटो भन्छन, ‘यो रोबोट कहिले मर्दैन । समयसँगै यसले आफूमा सुधार ल्याउनेछ भने बदलिंदो समयसँगै आफूलाई प्रासंगिक बनाउनेछ । यो नै यस रोबोटको विशेषता हो । बदलिंदो बौद्धधर्मसँगै यसले आफ्नो ज्ञानमा वृद्धि गर्नेछ तथा सँधै समयसँगै हिंडनेछ ।’