लोकसंवाद संवाददाता | समाचार | भदौ ७, २०७६
काठमाडौँ । जनकपुर -जयनगरसम्मको रेल तिहारसम्ममा सञ्चालनमा ल्याउने लक्ष्यका साथ सरकारले रेलवे कम्पनीलाई पुर्नस्थापित गर्ने तयारी गरेकाे छ ।
कम्पनीको स्थापित गर्नको लागि दक्ष प्राविधिकसहित झण्डै २०० कर्मचारीको प्रस्ताव गरिएको रेल विभागले जानकारी दिएकाे छ ।
हालको रेलवे कम्पनी नाम मात्रैको भएको विभागका महानिर्देशक बलराम मिश्रले स्वयंले जानकारी दिनुभएकाे छ ।
मिश्रका अनुसार हाल कम्पनीमा न्यून मात्र जनशक्ति रहेकाे छ । भएकाे जनशिक्त पनि रेलसम्बन्धी समान्य ज्ञान र क्षमता नभएको महानिर्देशक मिश्रको ठहर छ ।
रेल सञ्चालन गर्न उक्त कम्पनीलाई बलियो बनाउन प्रकृया अगडि बढाइएकाे छ । मिश्रको भनाई छ - सरकार आफैँले गर्दा खातालगायतका समस्या आउने हुँदा कम्पनीमार्फत सञ्चालनको तयारी भइरहेकाे छ ।
कम्पनी चलाउन २०० बढी जनशक्ति आवश्यक पर्छ ।
भारत सरकारको आर्थिक तथा प्राविधिक सहयोगमा निर्माणाधीन जनकपुर -जयनगरसम्मको रेल कात्तिकसम्ममा सञ्चालन गर्ने लक्ष्य रहेको विभागले जनाएको छ ।
सरकारले भारत सरकारसँग दुई रेल सेट खरीद गर्ने प्रक्रिया समेत अघि बढाएको थियो । विभागका प्रवक्ता अमन चित्रकारले दुई महीनाभित्रमा रेल नेपाल आइपुग्ने बताउनुभयो । पहिलोचरणमा एउटा सेट मात्र आउनेछ ।
भारतीय सरकारी कम्पनी कोनकान कम्पनीमार्फत रेल खरीद गर्न लागिएको हो ।
डिजेल, इलेक्ट्रिक, मल्टिपल युनिट प्रविधिको सो सेटमा एउटामा पाँच डिब्बा रहने छ ।
दुई सेट खरीद गर्दा त्यसमा जम्मा १० डिब्बा रहनेछन् । यसको यात्रु बहाक क्षमता एक हजार २०० सम्म रहने छ । प्रवक्त चित्रकारले भन्नुभयो, 'याे क्षमताभन्दा एक/ दुई सय तलमाथि हुनसक्छ ।'
भारतको जयनगरबाट धनुषाको कुर्थासम्म ३५ किलोमिटर लम्बाइको यो रेलमार्गका अरु भौतिक पूर्वाधार निर्माण भने भइसकेको छ ।
रेल लाइन तथा रेल्वे स्टेशन तयार भइसकेको उहाँको भनाइ थियो ।
यसमा कुर्थाबाट बिजलपुरा खण्ड १७ किलोमिटरसहित ५२ किलोमिटर आगामी फागुनसम्म सम्पन्न हुने र त्यसपछि रेल त्यहाँसम्म विस्तार हुने मन्त्रालयले जनाएको छ ।
गत महीनाको निरन्तर वर्षाका कारण कमला नदीको तटबन्ध बगाउँदा रेलमार्गमा क्षति पुगेको थियो ।
क्षति पुगेका ठाउँमा निर्माण कम्पनीले केही समयमा नै काम गरिसक्ने जनाइएको छ । प्रवक्ता चित्रकारले भन्नुभयो, 'हस्तान्तरण भइनसकेकाले भारतीय कम्पनीले नै काम गर्नेछ ।'
जनकपुर–कुर्था रेलमार्ग निर्माणका लागि भारत सरकासँग सन् २०१० मा सम्झौता भएको झण्डै एकवर्षपछि काम शुरु भएको थियो ।
भारतको सहयोगमा सीमाक्षेत्रमा पाँच स्थानमा रेलमार्ग निर्माण हुनलागेको चित्रकारले जानकारी दिनुभयो ।
तीमध्ये जयनगर–कुर्था र विराटनगर–जोगबनीबाहेक अरु तीन स्थानमा निर्माणको काम शुरु हुनसकेको छैन ।
रेलमार्गतर्फ नै विराटनगरबाट बथनाहासम्म १८ किलोमिटर रेलमार्गमा १० किलोमिटरको काम सम्पन्न भएको भौतिक योजना तथा यातायात मन्त्रालयले जनाएको छ ।
१० किलोमिटर रेलमार्ग सञ्चालनका लागि तयार भइसकेको छ ।
सीमाक्षेत्रमा निर्माण गर्ने भनिएको अरु तीन रेलमार्गमा जलपाइगुडी–काकडभिट्टा, नौतनहवा–भैरहवा र नेपालगञ्जरोड–नेपालगञ्ज रहेका छन् । यी सबै रेलमार्ग भारत सरकारले नै निर्माण गर्ने गरी सम्झौता भएको समाचार राससमा सञ्चिता घिमिरेले लेख्नु भएकाे छ ।