लोकसंवाद संवाददाता | विदेश | भदौ ८, २०७६
मेक्सिको, एएफपी । एउटा समाचार अनलाइनका प्रमुखको मेक्सिकमा छुरा प्रहार गरी हत्या गरिएको प्रहरीले जनाएको छ ।
मेक्सिकोका सरकारी वकीलले जारी गरेको प्रारम्भिक विवरणमा नेभिथ कोन्डेस जारामिल्लोको शव शनिबार बिहान फेला परेको र शरीरमा तिखो वस्तुले घोचेका निलडाम रहेको उल्लेख छ ।
प्रहरीले उक्त घटनाको अनुसन्धान गरिरहेको जानकारी दिएकाे छ ।
तेजुपिल्को नामको सानो शहरमा सञ्चालित स्थानीय अनलाइन सञ्चार माध्यमको प्रमुखको रुपमा नेभिथ कार्यरत थिए । उनी स्थानीय रेडियोमा समेत समाचार वाचकको जिम्मेवारीमा रहेको बताइन्छ ।
रिपोर्टर्स विदाउट बोर्डर्स (आरएसएफ) ले कोन्डेस जारामिल्लोमाथि जुन र गत वर्षको नोभेम्बरमा अज्ञात समूहले धम्की दिएको समाचार सार्बजनिक भएकाे थियाे । उनले संघीय सरकार समक्ष आफ्नो सुरक्षाका लागि आग्रह गरेका थिए ।
सन् २००० यतामात्र मेक्सिकोमा करिब १०० जना पत्रकारको हत्या भइसकेको छ ।
लागूपदार्थको अवैध कारोबार र राजनीतिक भ्रष्टाचारका कारण पत्रकारमाथि बारम्बार आक्रमण हुने गरेको छ ।
मेक्सिकोमा अधिकांश हत्याका घटनाको ठोस अनुसन्धान र दोषीमाथि कारबाही विरलै मात्र हुने गरेको छ ।
सन् २०१९ मा मात्र मेक्सिकोमा कोन्डेस जारामिल्लो सहित १० जना पत्रकारको हत्या भइसकेको छ ।