काठमाडौं : पछिल्लो डेढ महिनादेखि निकै उतारचढावका बीच कारोबार हुँदै आएको सुनको मूल्य स्थानीय बजारमा आज फेरि वृद्धि भएको छ । नेपाल सुन चाँदी व्यवसायी महासङ्घका अनुसार आज छापावाला सुनको मूल्यमा ८०० रुपैयाँले वृद्धि भई प्रति तोला ७३ हजार ४०० रुपैयाँ कायम भएको छ ।
बुधबार छापावाल सुन प्रति तोला ७२ हजार ६०० रुपैयाँमा कारोबार भएको थियो । सो मूल्य नेपालको इतिहासमा अहिलेसम्मकै उच्च हो । यस्तै, तेजाबी सुनको मूल्य पनि प्रति तोला ८०० रुपैयाँका दरले बढेको छ । तेजाबी सुनको मूल्य प्रति तोला ७३ हजार १०० रुपैयाँ कायम भएको छ । यसअघि तेजाबी सुनको मूल्य प्रति तोला ७२ हजार ३०० रुपैयाँ पुगेकोे थियो ।
सुनको मूल्य बढेसँगै चाँदीको मूल्य पनि वृद्धि भएको छ । स्थानीय बजारमा आज चाँदीको मूल्य प्रति तोला ८९५ रुपैयाा पुगेको छ । बुधबार चाँदी प्रति तोला ८८० रुपैयाँमा खरिद बिक्री भएको थियो । गत साउनको सुरुवातदेखि नै सुनको मूल्य तीव्र गतिमा उकालो लाग्न थालेको हो । गत साउन महिनामा सुनको मूल्य प्रति तोला सात हजार र चाँदीको मूल्य प्रति तोला ९५ रुपैयाँले वृद्धि भएको थियो ।
भदौ महिना लागेपछि पनि सुनको मूल्य लगातार बढिरहेको छ । साउन १ गते छापावाला सुन प्रति तोला ६४ हजार ५००, तेजाबी सुन ६४ हजार २०० र चाँदी प्रति तोला ७४५ रुपैयाँमा कारोबार भएको थियो । पछिल्लो समय अन्तर्राष्ट्रिय बजारमा पनि सुनको मूल्य बढ्ने क्रम रोकिएको छैन । विश्व बजारमा आज सुनको मूल्य प्रति औँस एक हजार ५४२.७५ अमेरिकी डलर पुगेको छ । अन्तर्राष्ट्रिय बजारमा बढ्दो क्रममा रहेको सुनको मूल्यले स्थानीय बजारलाई दबाबमा राखेको हो । अमेरिकी डलरको सटही दर बढेसँगै सुनको मूल्य पनि बढ्दै आएको छ ।
चीन–अमेरिका व्यापार टकराव तथा इरान–अमेरिका विवादले पनि सुनको भाउ बढाउन सहयोग गरेको बताइन्छ । सुनको मूल्यमा उतारचढाव देखिएपछि खपत भने ह्वात्तै घटेको छ । दैनिक २०-२५ किलो सुन खपत हुने नेपाली बजारमा पछिल्लो समय बिक्री ह्वात्तै खुम्चिएको महासङ्घले जनाएको छ ।