लोकसंवाद संवाददाता | शिक्षा | माघ २४, २०७५
भोजपुर । भोजपुर स्थित अरुण गाउँपालिका–५, कट्टीस्थित पञ्चकन्या आधारभूत निम्न माध्यमिक विद्यालयको ५९ औँ वार्षिक उत्सव भव्यरूपमा मनाइएको छ ।
उक्त अवसरमा सोही विद्यालयमा कार्यरत शिक्षिका तथा कवि प्रतिमा पोख्रेलको सौजन्यमा तथा १२ जना बालबालिकालाई पोसाक तथा विभिन्न शैक्षिक सामग्री प्रदान गरिएको थियो ।
कार्यक्रमका प्रमुख अतिथि पूर्व सांसद लोकमणि ढकाल, विद्यालय व्यवस्थापन समितिका अध्यक्ष डम्बरबहादुर राई र प्रधानाध्यापक शालिकराम ढकाललगायतले उक्त सहयोग सामग्री हस्तान्तरण गरेका थिए ।
असहाय तथा अभिभावक विहीन बालबालिकालाई थोरै भए पनि राहत पुगोस् र उनीहरूलाई पढ्न हौसला मिलोस् भन्ने उद्देश्यले आफ्नो तलबबाट केही रकम छ्ट्याएर सहयोग गरेको शिक्षिका पोखरेलले बताएकी छन् । उनले भनिन्, ‘मसँग धन भएर होइन मनले मात्र यो सानो सहयोग गरेकी हुँ ।’ उनले गत वर्षबाट यस्तो सहयोग थालेकी हुन् ।
पूर्व सांसद ढकालले सहयोगका लागि शिक्षिका पोखरेललाई धन्यवाद दिँदै भने, ‘मनकी धनी प्रतिमा मिसबाट हामीले पनि समाजसेवा सिक्नु अवक्कयक छ । उनको यस कार्यले हाम्रा पनि आँखा खुलेका छन् ।’