लोकसंवाद संवाददाता | समाचार | भदौ १४, २०७६
तनहुँ । पृथ्वीराजमार्गअन्तर्गत तनहुँको दमौली–डुम्रे सडकखण्डमा खटिएका ट्राफिक प्रहरीले स्वास्थ्य परीक्षण गरेर पठाउने गरेकाे पाइएकाे छ ।
सड्कमा खटिए ट्राफिक प्रहरीले सवारी रोक्दै चालकलाई बोलाउन थाले । शुरुमा सवारी चालक कारवाहीमा परिने हो कि भन्ने डरले झस्किए ।
तर गाडीबाट निस्केर बाहिर आएपछि उनीहरुले थाहा पाए, स्वास्थ्य परीक्षणका लागि बोलाइएको रहेछ ।
आँखाको कमजोरीका कारण हुनसक्ने सवारी दुर्घटना न्यूनीकरण गर्नका लागि जिल्ला प्रहरी कार्यालय तनहुँ र ट्राफिक प्रहरी कार्यालय तनहुँले सडकमै सवारीचालकको स्वास्थ्य परीक्षण थालेकाे हाे ।
लामो दूरीका सवारीसाधन र मालवाहक ट्रकका कारण धेरै दुर्घटना हुने गरेकाले दोस्रोपटक सवारी चालकको स्वास्थ्य परीक्षण गरिएको प्रहरी उपरीक्षक विनोद सिलवालले जानकारी दिनुभयो ।
दमौली अस्पतालको प्राविधिक सहयोगमा सञ्भचालन भएको आँखा शिविरमा १२६ चालकको आँखा र रक्तचाप परीक्षण गरिएको ट्राफिक प्रमुख प्रहरी नायब निरीक्षक पूर्णबहादुर अधिकारीले जानकारी दिनुभयो ।
ती चालकमध्ये तीन जनाको आँखा कमजोर भएकाेले गाडि चलाउन अयाेग्य देखिएकाले थप उपचारका लागि सुझाव दिइएको उहाँले बताउनुभयो ।
त्यस्तै १६ जना चालकको रक्तचाप उच्च देखिएकाले औषधि प्रयोग गर्न सुझाव दिइएको थियो ।