बङ्गलादेशको राजधानी ढाकामा मन्त्रीको कारलाई लक्षित गरेर बम आक्रमण भएको छ । शनिवार राती भएको आक्रमणमा परी दुई जना प्रहरी घाइते भएको स्थानीय प्रहरी अधिकारीहरूले आइतबार बिहान जानकारी दिएका छन् ।
आक्रमणमा को संलग्न थियो भन्नेबारेमा अहिलेसम्म कुनै पहिचान हुन नसकेको प्रहरीको भनाइ छ । अमेरिकामा कार्यालय रहेको अनुगमनकर्ताहरूको संस्था एसआईटीईले आइतबार ट्विटरमा लेखेको छ, 'इस्लामिक स्टेट (आईएस)ले ढाकामा भएको बम आक्रमण आफूहरूको तर्फबाट गराइएको दाबी गरेको छ ।' स्थानीय सरकार तथा ग्रामीण विकासमन्त्री ताजुल इस्लामलाई एउटा कार्यक्रममा सहभागी हुन गइरहेका बेला आक्रमण भएको हो ।
उहाँलाई छ जना सुरक्षाकर्मीले सुरक्षा दिँदै लगेका थिए । मन्त्री इस्लाम बङ्लादेशको सीमा सुरक्षा बलको कार्यक्रममा सहभागी हुन लाग्नुभएको डीएमपी कार्यालयले जनाएको छ । स्थानीय समयअनुसार शनिवार राती ९.२० बजेतिर विस्फोटन भएको प्रत्यक्षदर्शीहरूले बताएका छन् ।