साउदी अरब नेतृत्वको सेनाले गरेको हवाई आक्रमणमा परी यमनमा पछिल्लो समय १०० जना मारिएको रेडक्रसको अन्तर्राष्ट्रिय समितिले आइतबार जनाएको छ ।
हुथी विद्रोहीहरूले ड्रोन र मिसाइलहरू संकलन गरेर राखेको सूचनाका आधारमा गठबन्धन सेनाले उक्त स्थानमा आक्रमण गरेको थियो । हुथी विद्रोहीका अनुसार विद्रोहीहरूले कारागारको रूपमा उपयोग गर्दै आइरहेको भवनमा आक्रमण भएको हो ।
संयुक्त राष्ट्रसंघीय अधिकारीहरूले घटनामा परी कम्तीमा ५२ जना मारिएको शव नै भेटिएको र अरू ६८ जना हराइरहेको जनाएका छन् । रेडक्रसको अन्तर्राष्ट्रिय समितिले दामरस क्षेत्रमा औषधि तथा अन्य सहयोग सामग्रीसहितको टोली पठाइएको बताएको छ ।
'अहिले आक्रमण भएको क्षेत्रमा आइसीआरसीको टोलीले यसअघि नै स्थलगत अध्ययन भ्रमण गरिसकेको थियो', यमनका लागि आइसीआरसीले खटाएको टोलीका प्रमुख फ्रान्ज रौचेन्स्तैनले धमारबाट एएफपीसँग भन्नुभयो । उहाँले थप्नुभयो, 'कारागारमा आक्रमण हुनु यसको सबैभन्दा नराम्रो पक्ष हो, यसका लागि अन्तर्राष्ट्रिय कानुन आकर्षित हुन्छ ।'
रौचेन्स्तैनले एक सय बढीको मृत्यु भएको अनुमान गरिएको जानकारी दिनुभयो । उहाँका अनुसार अरू ४० जनालाई घाइते अवस्थामा अस्पतालमा उपचार गराइएको छ । घटनास्थलबाट आइसीआरसीको टोलीले शवहरू सङ्कलन गरेको थियो ।
