लोकसंवाद संवाददाता | खेलकुद | भदौ १७, २०७६
विश्व फुटबलको सर्वोच्च निकाय फिफाले प्रदान गर्ने वर्ष खेलाडीको अवार्डका लागि अन्तिम तीन खेलाडीको मनोनयन सार्वजनिक भएको छ ।
पहिलो चरणमा छनोट भएका १० खेलाडीबाट तीन जनाको नाम सार्वजनिक गरिएको हो । बार्सिलोना तथा अर्जेन्टिनाका लियोनल मेस्सी, युभेन्टस तथा पोर्चुगलका क्रिस्टियानो रोनाल्डो र लिभरपुल तथा नेदरल्यान्डका भान डाइक मनोनयनमा परेका हुन् ।
लिभरपुललाई च्याम्पियन्स लिगको उपाधि जिताउन महत्त्वपूर्ण भूमिका खेलेका डिफेन्डर भान डाइकलाई मुख्य प्रतिस्पर्धीको रूपमा हेरिएको छ । उनले केही दिनअघि मात्रै युरोपको वर्ष खेलाडीको अवार्ड प्राप्त गरेका थिए । उनले सो अवार्डमा पनि मेस्सी र रोनाल्डोलाई नै पछि पारेका थिए ।
रोनाल्डोले गत वर्ष पोर्चुगललाई युईएफए नेसन्स लिग र युभेन्ट्सलाई इटालियन सिरी ‘ए’ को उपाधि जिताएका थिए ।
मेस्सीले बार्सिलोनालाई ला लिगाको उपाधि जिताउँदा च्याम्पियन्स लिगमा सर्वाधिक गोलकर्ता बनेका थिए । उनले युरोपियन गोल्डेन बुटको अवार्ड पनि जितेका थिए ।
फिफा वर्ष खेलाडी महिलातर्फ युईएफए वर्ष खेलाडी अवार्ड जितेकी लुसी ब्रोन्ज, एलेक्स मोर्गन र मेगान रापोनी परेका छन् ।
वर्ष पुरुष प्रशिक्षकको अन्तिम मनोनयनमा पेप ग्वार्डीवाला, योर्गेन क्लोप र माउरिसियो पोचेटेनो रहेका छन् । महिला प्रशिक्षकतर्फ ग्रे नेभिल्स, जिल एलिस र सरिना विगम्यान रहेका छन् ।
वर्ष गोलकिपर अवार्डका लागि एलिसन बेकर, एण्डरसन मोरिस र मार्क टेर स्टेगेन परेका छन् ।
त्यस्तै, वर्ष उत्कृष्ट गोल पुस्कास अवार्डका लागि लियोनल मेस्सी, जुवानफर क्वान्टेरो र डानियल जेसोरीको गोल शीर्ष तीनमा परेको छ । गत वर्ष क्रोएसियाका कप्तान तथा रियल मड्रिडका मिडफिल्डर लुका मोड्रिचले फिफा वर्ष खेलाडीको अवार्ड जितेका थिए ।