काठमाडौं : भदौ दोस्रो साता केही ओरालो लागेको सुनको मूल्य आज फेरि प्रति तोला ५०० रुपैयाँले वृद्धि भएको छ । नेपाल सुन चाँदी व्यवसायी महासङ्घका अनुसार आज छापावाला सुनको मूल्य प्रति तोला ७२ हजार ५०० रुपैयाँ पुगेको छ ।
आइतबार र सोमबार छापावाला सुन प्रति तोला ७२ हजार रुपैयाँमा खरिद बिक्री भएको थियो । त्यस्तै, तेजाबी सुनको मूल्य पनि प्रति तोला ५०० रुपैयाँले वृद्धि भएको छ । तेजाबी सुनको मूल्य प्रति तोला ७२ हजार २०० रुपैयाँ निर्धारण गरिएको महासङ्घले जनाएको छ । यसअघि तेजाबी सुन प्रति तोला ७१ हजार ७०० रुपैयाँमा कारोबार भएको थियो ।
सुनको मूल्य वृद्धि भएसँगै चाँदीको मूल्य पनि सामान्य वृद्धि भएको देखिएको छ । नेपाली बजारमा आज चाँदीको मूल्य प्रति तोला १० रुपैयाँले वृद्धि भई ८९५ रुपैयाँ पुगेको छ । पछिल्लो १५ दिनमा सुनको मूल्य चार पटक बढेको छ भने दुई पटक घटेको छ । सो अवधिमा सुनको मूल्य प्रति तोला दुई हजार ५०० रुपैयाँले वृद्धि भएको छ ।
भदौ १ गते छापावाला सुनको मूल्य प्रति तोला ७१ हजार र तेजाबी सुनको मूल्य प्रति तोला ७० हजार ७०० रुपैयाँ कायम भएको थियो । साउन महिनाको सुरुवातदेखि नै नेपाली बजारमा सुनको मूल्य उकालो लाग्न थालेको हो । साउन महिनामा मात्रै सुनको मूल्य करिब सात हजार ५०० रुपैयाँले वृद्धि भएको थियो ।
अन्तर्राष्ट्रिय बजारमा सुनको मूल्य अकासिएसँगै नेपाली बजारमा पनि मूल्य बढेको महासङ्घले जनाएको छ । आज अन्तर्राष्ट्रिय बजारमा सुनको मूल्य प्रति औँस एक हजार ५२७.१० अमेरिकी डलर पुगेको छ । अन्तर्राष्ट्रिय बजारमा बढ्दो सुनको मूल्यले नेपाली बजारलाई दबाबमा पारेको हो । बढ्दो क्रममा रहेको चीन–अमेरिका व्यापार युद्ध, अमेरिकी केन्द्रीय बैंकद्वारा ब्याजदरमा कटौतीलगायत कारणबाट विश्व बजारमा सुनको मूल्य प्रभावित भइरहेको छ । पछिल्लो समय अमेरिका र चीनले एकअर्का देशका उत्पादनमा थप कर वृद्धिको घोषणा गरेसँगै सुनको मूल्य झन् प्रभावित हुने आँकलन गरिएको छ ।