काठमाडौं : काठमाडौं महानगरपालिका– १२ टेकुस्थित ऋषेश्वर मन्दिरमा करिब एक लाख महिलाले सप्तऋषिको पूजा गरेका छन् । प्रत्येक वर्ष ऋषिपञ्चमीका दिन यहाँ मेला लाग्ने गर्छ । मन्दिरमा महिला गए रातीदेखि दर्शनका लागि लाम लागेका थिए ।
उक्त स्थानमा परापूर्वकालमा कश्यप, अत्रि, भारद्वाज, विश्वामित्र, गौतम, जमदग्नि र वशिष्ठ ऋषि आई पूजा गरेको विश्वासका साथ उनीहरूको प्रतीकका रूपमा मूर्ति राखिएको छ । यहाँ पूजा गर्नाले सबै दोष नाश भई समृद्धि प्राप्त हुने विश्वास रहिआएको छ ।
हरितालिका तीजका दिन व्रत बसेका महिलाले आजको दिन नदी, ताल, तलाउ र पोखरीमा दतिवनले दाँत माँझेर, चोखो माटो, तिल र गोबर लगाई स्नान गर्ने तथा चोखो वस्त्र पहिरेर मध्याह्नमा अरुन्धतीसहित सप्तऋषिको षोडशोपचार विधिले पूजा गरी ब्राह्मणलाई दान दक्षिणा दिने चलन छ ।
ऋषिको पूजा गर्दा विवाहित महिलाले अटल सौभाग्यका लागि चुरा, धागो, सिन्दूर र पोते पनि चढाउँछन् । रजस्वलाको क्रममा अन्जानवस भएका भूलबाट छुटकारा पाउन महिला सप्तऋषिको पूजा गरी पूर्ण रूपमा शुद्ध हुने विश्वास गरिएको छ । पापबाट मुक्त हुन भाद्र शुक्ल पञ्चमीको दिन ३६५ दतिवन लिई माटो तथा गाईको गोबर लगाएर ३६५ पटक नुहाउनुपर्ने हुन्छ ।
काठमाडौं महानगरपालिका विपद् व्यवस्थापन तथा नागरिक सुरक्षा समिति र सामुदायिक शहरी स्वास्थ्य क्लिनिकले व्रतालुलाई निःशुल्क स्वास्थ्य सेवा प्रदान गरेका थिए ।