इराकको उत्तरी प्रान्त निनेभेहमा मङ्गलवार प्रहरीले गरेको कारबाहीका क्रममा इस्लामिक स्टेट्स (आईएस) आतङ्ककारी समूहका नौ जना लडाकू मारिएका छन् । इराकी सेनाले उक्त जानकारी दिएको छ ।
अमेरिका आवद्ध अन्तर्राष्ट्रिय संयुृक्त गठबन्धन सेनाको सहयोगमा इराकी सेनाले सो कारबाही गरेको थियो । सो कारबाहीको क्रममा प्रान्तीय राजधानी मोसुलबाट दक्षिणपश्चिममा पर्ने सहजी इलाकामा एक सुरुङ ध्वस्त हुनुका साथै नौ जना आईएस लडाकु मारिएका इराकी संयुक्त कारबाही कमाण्डका प्रवक्ता याहया रसुउलले विज्ञप्तिमार्फत् बताउनुभएको छ ।
सन् २०१७ को अन्त्यमा इराकी सुरक्षा बलले देशभर कट्टरपन्थी आतंकवादलाई पूर्ण रूपले हराएपछि इराकको सुरक्षास्थिति नाटकीय रूपमा सुधार भएको छ । यद्यपि, आईएसका लडाकु समूहले ग्रामीण क्षेत्रहरूमा आफ्नो सुरक्षित आश्रयस्थल बनाएर बसेका छन् र सरकारी संघ संस्था र सर्वसाधारणमाथि आक्रमण गर्दै आएका छन् ।
