पूर्वी सिरियामा इरान समर्थक सेना र नागरिक सेना आखडा लक्षित भएको हवाई आक्रमणमा परी १८ लडाकु मारिएका सिरियामा जारी द्वन्द्वलाई निरीक्षण गरिरहेका मानव अधिकारवादी समूहले जानकारी दिएको छ ।
इराकको सिमाना नजिकै अल–बुकामालमा सो आक्रमण भएको बेलायतसँगआवद्ध सिरियन अब्जरभेटरी फर ह्युमन राइट्सले जानकारी दिएको छ । यस घटनाको विस्तृत विवरण भने प्राप्त भएको छैन ।
सिरियामा सन् २०११ को मार्च महिनाबाट त्यहाँका राष्ट्रपति बसर अल असदको राजीनामाको माग गर्दै जनआन्दोलन सुरु भएको थियो । सो जनआन्दोलन केही समयपछि गृहयुद्धमा परिणत भएको थियो । उक्त युद्धमा अल–कायदा र इस्लामिक स्टेट्स जस्ता आतंककारी समूह हाबी हुँदै गए ।
आन्दोलनमा परी सो समयदेखि हालसम्म ३ लाख ७० हजार बढी मानिसको मृत्यु भइसकेको छ । यस द्वन्द्वमा परी लाखौँ व्यक्ति घाइते भएका छन् भने लाखाैँ आफ्नै देश र विदेशमा शरण लिएर बस्न बाध्य भएका छन् ।
