दक्षिण कोरियाली एकजना आणविक दूत चीन भ्रमणमा जान लाग्नुभएको छ । मंगलवार मात्र उत्तर कोरियाले दुईवटा साना क्षेप्यास्त्र परीक्षण गरेको समाचार आएको भोलिपल्टै दक्षिण कोरियाली आणविक दूतले चीन भ्रमण गर्ने दक्षिण कोरियाली विदेश मन्त्रालयले बुधबार जनाएको छ ।
मन्त्रालयका अनुसार कोरियाली प्रायद्वीपका लागि दक्षिण कोरियाली उच्च आणविक दूत ली दु हुनले यसै हप्ता चीनको भ्रमण गर्न लाग्नुभएको हो । कोरियाली द्वीपको शान्ति र सुरक्षासम्बन्धी दूत हुनले यही बिहीबार चीन भ्रमण गर्ने र चीनका उपमन्त्री लुओ चाओइसँग भेटवार्ता गर्नुहुने बताइएको छ ।
संयुक्त राज्य अमेरिकासँग उत्तर कोरियाले हालै मात्र वार्ताका लागि आह्वान गरेको थियो । त्यसलगत्तै उत्तर कोरियाले मंगलवार मात्र समुद्री तटतर्फ छोटो दूरीका हतियार नै प्रहार गरेको समाचार आएको छ । दक्षिण कोरियाली विदेश मन्त्रालयले बुधबार दिएको जानकारीअनुसार उक्त भेटका क्रममा द्विपक्षीय हितका विभिन्न विषयहरूका साथै कोरियाली द्वीपमा हालै विकसित परिस्थितिका बारेमा कुराकानी हुनेछ ।
उत्तर कोरियाका पहिलो उपविदेशमन्त्री चो सन हुईले उत्तर कोरिया अमेरिकासँग आगामी सेप्टेम्बर महिनामा वार्तामा बस्न इच्छुक रहेको जानकारी एक विज्ञप्तिमार्फत् दिनुभएको छ । उत्तर कोरियाली सरकारी समाचार समितिले सोमबार सो जानकारी दिएको थियो । अमेरिकासँग वार्तामा बस्न आफूहरू इच्छुक रहेको तर वार्ताका लागि दिन भने निश्चित नभएको उहाँले बताउनुभएको थियो । उहाँ गत महिना दक्षिण कोरिया भ्रमणमा जानुभएको थियो । त्यस क्रममा उहाँले संयुक्त राज्य अमेरिका उत्तर कोरियासँग कोरियाली द्वीपका विषयमा कुराकानी गर्न चाहेको बताउनुभएको थियो । सोही अनुसार नै दक्षिण कोरियाले पनि अमेरिकासँग बस्ने चाहना राखेको र त्यसका लागि सेप्टेम्बरको अन्त्यतिरको समय प्रस्ताव गरिएको जानकारी पनि दिनुभएको थियो ।
उत्तर कोरियाले अमेरिकासँग अर्काे चरणको वार्ताका लागि तथा आणविक कार्यक्रमहरूको पूर्ण रूपमा अन्त्यका लागि आफूमाथि लागेका प्रतिबन्धहरूलाई फुकुवा गर्नुपर्ने माग गर्दै आएको छ । तर पनि अमेरिकाले उत्तर कोरियामाथि लगाउँदै आएका प्रतिबन्धहरू फुकुवा गर्ने विषयमा भने केही बताएको छैन ।
अमेरिकासँग यसअघि नै भएको कुराकानीअनुसार ती प्रतिबन्धहरू फुकुवा नगर्ने हो भने वार्ताको कुनै औचित्य नै नरहने धारणा उत्तर कोरियाली नेता किम जोङ अनले राख्दै आउनुभएको छ । अमेरिका र उत्तर कोरियाबीच तीन पटकसम्म उच्चस्तरीय वार्ता भइसकेका छन् ।