लोकतान्त्रिक गणतन्त्र कंगोमा बिहीवार भएको रेल दुर्घटनामा परी कम्तीमा ५० जनाको मृत्यु भएको छ । दुर्घटनामा परेको रेल रेलमार्गबाट बाहिर निस्किएर बिहीवार बिहान दुर्घटना भएको मानवीय सहायतामन्त्री स्टेभ एमबिकायीले जानकारी दिनुभयो ।
उहाँले सामाजिक सञ्जाल ट्विटरमा लेख्नुभएको छ, 'फेरि अर्को बज्रपात ! स्थानीय समयअनुसार बिहान ३ बजेतिर ताङ्गान्यिक प्रान्तको मायिबारिदीमा रेल मार्ग छाडेको रेल दुर्घटनामा पर्यो, अहिलेसम्म ५० जनाको मृत्यु भएको छ, अरू धेरै घाइते भएका छन् ।'
कंगोमा रेलमार्गको अवस्था अत्यन्त नाजुक रहेको र सुरक्षित नरहेको मानिन्छ । खराब अवस्थाको रेलमार्गका कारण धेरै दुर्घटना हुने र धेरै जनाको ज्यान जाने गरेको छ । गत मार्चमा भएको अर्को एक दुर्घटनामा परी कम्तीमा २४ जनाको मृत्यु भएको थियो भने ३१ जना घाइते भएका थिए ।