जोर्डनमा जारी एएफसी यु- १६ च्याम्पियनसीप छनोटअन्तर्गत नेपालले कुवेतसँग खेल्ने भएको छ । जोर्डनको प्रिन्स मोहम्मद अन्तर्राष्ट्रिय रङ्गशालामा नेपालले सोमवार राती कुवेतसँग प्रतिस्पर्धा गर्नेछ ।
साफ यु- १५ च्याम्पियनसीपमा उपविजेता बनेर फर्केको नेपाली फुटबल टोली दुई सातापछि जोर्डन पुगेको हो । नेपाली टोलीले सुरुवातमा कमजोर खेल प्रदर्शन गरेको थियो । भदौ २८ गते पहिलो खेलमा नेपाल आयोजक जोर्डनसँग ७–० गोलले पराजित भएको थियो । कुवेतले पहिलो खेलमा श्रीलङ्कालाई २–० गोलले हराएको थियो ।
सन् २०२० मा आयोजना हुने एएफसी यु- १६ च्याम्पियनसीपअन्तर्गत नेपाल समूह ‘ए’मा रहेको छ । उक्त समूहमा आयोजक जोर्डनसहित कुवेत, ताजकिस्तान र श्रीलङ्का छन् । प्रतियोगितामा ३ अङ्कसहित जोर्डन शीर्ष स्थानमा छ । समान ३ अङ्कसहित कुवेत गोल अन्तरका आधारमा दोस्रो स्थानमा छ । अङ्कविहीन ताजकिस्तान, श्रीलङ्का र नेपाल क्रमशः तेस्रो, चौथो र पाँचौँ स्थानमा छन् ।
प्रतियोगिताको शीर्ष स्थान हासिल गर्ने टोली दोस्रो चरणका लागि छनोट हुनेछ । विभिन्न समूहमा विभाजित उक्त छनोट खेलमा ४८ राष्ट्र सहभागी छन् ।
